Marisol Lopez-Tromp hunto cu Holmo Henriquez a presenta na Camara di Comercio pa saca e uittreksel, den cual oficialmente a haci e cambio den directiva. Marisol Lopez awo ta presidente di Movimiento Arubano Soberano (MAS). Holmo Henriquez a haci e traspaso oficial door di a entrega Marisol Lopez-Tromp, cual slogan di partido ta ‘Kibrando barera, bo ta crea futuro.’
Holmo Henriquez a bisa cu oficialmente a haci un traspaso di partido MAS na un lider nobo y asina esaki ta bira completamente di dje. Henriques no ta bay sigui mas den politica y ta retira. Pero tur cos tin su proceso y esakinan mester cana debidamente. No a bende e partido, pero a yega na un bon entendimento y aceptaciondi e statuut, idealogia cu e partido ta para p’e. Di mira cu ambos banda tin meta comun, a sigui cu e proceso cu e directiva, tambe a consulta cu e miembronan di partido pa por a yega un decision unanime. Nan a nombra lider di MAS y tambe e presidente, tesorero y secretario nobo.
Nan no a bende ni huur e partido. E proceso a bay sublime. Henriquez a records cu a lanta MAS cu e meta pa traha p’e interes general di e pais. “Marisol, den su ultimo tempo di gobierno, a trata di trece claridad, desenmascara e corupcion cu tabata pasando y a cort’e den su proceso.” E tin di hiba e lucha pa trece mas claridad p’e pueblo.
Como lider di partido MAS, Lopez-Tromp, cu a finalisa e procedura di traspaso, unda ta cumpli cu tur cos di statuut y regla. El a splica cu tur hende sa pakico tur a bah’e di su funcion como minister na momento e tabata lucha pa cosnan iregular. Mientras e tabata haci e funcion di minister, el a topa cu corpucion. Na luga di haya sosten, pa luna el a hay’e den un lucha unda coalicion di parlamento a retir’e ilegal. Pa despues Conseho di Minister a dicidi mand’e cas c’un carta na Gobernador.
E ta orguyoso di lidera un partido den su 23 aña di carera politico. El a eherce diferente funcion como parlamentario, minister, lider di fraccion y presidente di parlamento. Diferente persona a acerca su persona, a haci apelacion p’e sigui cu e lucha. El a scucha di diferente persona, di su famia y ta gradici nan.
Aworaki ta den pandemia, periodo di problema financiero, problema den parti di salubridad door di Coronavirus a trece cu ne mundialmente y p’esey p’e partido MAS e campaña aki lo ta uno humilde, simpel. Pero nan lo ta hopi skerpi y duro cu mensahenan yega cla den cada hogar.
