Diahuebs, dia 22 di april, 2021, sigur ta un fecha cu lo keda graba den memoria di docente Nigel Matthew, ya cu Colegio San Nicolas awo a bira Colegio Nigel Matthew.
E mes ta conta di ta sinti su mes hopi honra. No tin palabra pa describi, el a comenta.
E tabata sintie sumamente emociona. Nunca el a pensa cu esaki a bira algo cu lo experencia. E ta hopi gradicido pa esunnan cu a bin cu e iniciativa pa cambia nomber di e scol y e apoyo grandi cu Matthew a haya semper di su famia.
El a conta cu entre e coleganan a informa nan cu gobierno a aproba un dependance y a pensa cu lo scoge Nigel Matthew pa bay maneh’e. E mes no por a pensa di bisa si of no. El a bay na su mama, pasobra su mayornan ta esunnan cu a bringa pa tin scolnan mixto (mucha homber y mucha muhe). Matthew sa cu awendia su mayornan lo mester ta contento cu e hecho pa tin un scol avansa na San Nicolas.
A pesar cu el a baha cu pensioen, el a sigui traha na e scol. Tambe el a keda duna les pa algun ora te cu 2011. Despues el a dicidi cu el a stop. Durante un vakantie el a haya un yamada pa asina e bin run middag-HAVO. El a haci esaki pa un aña.
Mientras tanto tabata negoshando pa e scol haya su bovenbouw. El a bira despues di tempo conrector, asistiendo meneer Fingal kende tabata rector e tempo ey.
Fuera di esey Matthew a haya e appel di oro na 2015, pa despues stop cu e trabao di docente. Esaki ta un trayectorio di mas di 40 aña.
Por ultimo, Matthew a conta cu e ta kere cu Colegio San Nicolas tabatin un bon reputacion. No ta tur ora tur cos ta bay suave den enseñansa. E ta spera cu e reputacion ey por bin bek. Esey tin di haber cu si traha eynan, hacie cu pasion y henter e curason. Si bin como alumno, bin cu ambicion, sea abierto pa siña algo.
“Bisa bo mes cu ‘ami lo ta ora mi caba e scol aki, proud di mi mes y di mi scol,” Matthew a termina bisando.
