“Un pregunta logico? Tin varios siman nos por tende den media e tema di Arubahuis y investigacion (of no) pa wak kico por a bay robes. Mi por a tende cu Departamento di Recurso Humano (DRH) y Centraal Accountantsdienst di Aruba (CAD) lo ta bezig”, asina e conocido abogado mr. Lincoln “Dello” Gomez a skirbi awe diadomingo riba su pagina personal di Facebook. “Awor si ta asina cu ta wordo investiga temanan financiero-administrativo cu kisas hasta por yega e nivel di irregularidad of fraude cometi na Hulanda den Arubahuis, mi ta puntra mi mes dicon no a informa Ministerio Publico di Hulanda pa haci e investigacion?”
Mas leu, e abogado, siendo un bon conocedo di leynan civil y penal a sigui skirbi cu “Esaki lo ta logico pasobra si a comete un acto fraudulento na Hulanda, segun ley penal Hulandes, ta Ministerio Publico Hulandes ta esun cu tin hurisdiccion pa investiga y si ta necesario persigui esunnan envolvi. Ni CAD ni pais Aruba tin e autoridad ey. Ademas, cu Hulanda lo tin e recursonan y experticio pa investiga y saca resultado liher y sin ningun gasto pa pais Aruba, pasobra e echo cu ta investiga a pasa riba teritorio Hulandes. Arubahuis no ta teritorio di Aruba den Hulanda ni tampoco tin un status diplomatico manera un embahada. Aruba sowieso no tin ningun embahada.”
Na final e experto di ley a sigura cu e ponencia/pregunta cu el a haci ta parc’e logico. E ta cuestiona dicon ningun politico of media of e watchdognan no a cay riba e punto aki? Kisas a stop di pensa of di ta critico? “Of kisas ami a miss algo den ley Hulandes? Dios lo sa.”
