Kiwanis Club of San Nicolas a tene un evento di instala su directiva nobo. Pa celebra esaki, nan a trece tur invitado hunto. Tambe a celebra e logronan dje directiva saliente cu a haci diferente proyecto impactante den San Nicolas.
Esther Emerencia Gomes, presidente di Kiwanis Club of San Nicolas, a splica cu esaki ta proyectonan cu nan ta bay sigui carga y pa haci diferencia den tanto e muchanan como hubentud pa inspira y empodera nan. E club aki ta esun di mas nobo entre tur e clubnan di Kiwanis na Aruba.
Emerencia Gomes a splica cu e club ta consisti entre 30 pa 35 miembro, pero nan ta creciendo. Cada aña nan tin cambio di miembro dje directiva, di cual tin di nan cu ta postula nan mes un biaha mas, mientras tin otro ta drenta cu idea nobo. Esunnan saliente ta haya oportunidad pa sigui como miembro y participa n’e proyectonan cu Kiwanis Club of San Nicolas ta organisa.
E organisacion aki ta trece hunto e personanan cu tin curason pa sirbi. A base di boluntario nan ta scoge pa duna di nan tempo, esfuerso y dedicacion pa bin cu idea kico nan por haci hunto como club p’asina por duna bek na comunidad di Aruba. Nan tema Kiwanistico di 2022-2023 ta ‘Be Bold.’ El a splica cu ‘bold’ nan ta referi pa ta balente, sea optimista, sea amoroso, sea decisivo cu e futuro di hubentud y mucha.
Pa mas lesa TREMPAN.COM.
