Situacion di biento a bira un problema na diferente area y cu diferente sucedido. Esun mas preocupante a bira esun di e señora di edad na Watapana Gezaag na San Nicolas.
Mesora a tuma contacto cu e victima p’asina e duna declaracion di e hechonan y kico ta e intencion mientrastanto cu logra repara e dak.
Clara Kock ta conta cu e tabata sinta den cas ora cu biento fuerte a cuminsa haci un desordo masha mahos riba dak di su cas. El a scucha un batimento fuerte y na mes momento a tuma nota cu awa a cuminsa yobe y e biento a sigui asota e dak.
E zonido tabata biniendo di e direccion di e camber y pa ora cu el a yega eybanda, a constata cu e biento a bay cu e dak caba lagando bay for di e muraya. Tabata un susto hopi grandi.
Despues di esey Clara ta conta cu el a keda paden un rato pa despues e bay habri porta dilanti di sala. Bisiña atento tambe a yega na porta di cas pa tira bista si Clara tabata ok. Su contesta tabata: “ Mi ta bon, pero e biento a bay cu mi dak di cas”. E bisiña tambe ta conta Clara cu el a wak e dak bula bay.
Na mes momento Clara a cuminsa busca comunicacion cu su yiu, cu tabata encontra su mes te na Noord. A pensa riba e swa cu tabata mas cerca y cu a bin di biaha. Un rato despues, ora Clara su susto a baha un poco a cuminsa busca den area pa e dak. A yama Brandweer como tambe Polis cu a presenta y a cuminsa duna asistencia. Na sitio a combersa tambe cu Servando Lopez cu ta subrino di e victima. Di su banda e ta conta cu e situacion ta tristo.
Lo aprecia cualkier ayudo y ta remarca cu e cas ta di famia di cual Clara tin basta tempo ta biba aden. Polis di Bario a tuma tur datos p’asina cuminsa brinda e ayudo inmediato. DOW tambe a presenta y tabata trahando un rapport di e daño pa asina entrega esaki y wak con por yega na ayudo lo mas pronto posibel.
Famia di su banda no ta kere cu por warda riba rapport pa despues haya contesta. Situacion ta rekeri yudansa inmediato. Di nan banda nan a cuminsa informa nan mes riba costo di material cu lo tin mester pa drecha e daño actual. Algun hende a ofrece lona como alternativa temporal, pero mirande e situacion di tempo, nan miedo di mas grandi ta e daño adicional cu por bin na momento cu awa yobe y afecta e parti paden di e cas.
E pregunta lo ta si cu nan propio forsa nan lo logra, si awa lo duna nan un chens pa drecha e dak prome cu e sigui yobe y si lo haya hende cu por bin yuda pa drecha e dak na tempo.
Cu tristesa den su curason Clara ta conta cu e no ta kere cu ta algo cu por a preveni, sea cual sea e material di e dak, pero un cos ta sigur, nunca el a yega di mira algo asina ey sosode cu biento.
