Aruba, apesar di advertencia, a keda sorprendi cu e yobida cu a yega den oranan di merdia cu un biento fuerte. Video y comentarionan na cantidad por a mira y lesa riba Facebook di e biento cu a cuminsa na San Nicolas bin abou.
E biento fuerte no solamente a percura pa lama bruto, cu ola grandi, pero tambe daño na nos naturalesa.Na diferente parti di Aruba manera na Pos Chiquito, Tamarijn, Palm Beach y otro areanan matanan a sucumbi pa e forsa feroz di e bientonan. Esaki na su turno a causa tambe un congestion di trafico.
Dañonan mas grandi tabata na daknan di cas, entre otro na Watapanagezag unda un señora di edad ta biba su so. Durante e pasada di e biento fuerte, cuatro hoben den un boto chikito a confronta problema banda di Zeewijk. Kustwacht mester a saca un boto pa yuda nan bini tera. E boto a keda na e rif na Zeewijk. Segun informacion di Meteo Aruba, por spera mas yobida y biento fuerte manera cu a experencia awe durante oranan di dia.
