Diadomingo anochi Wardacosta di Caribe Hulandes y Cuerpo Policial Aruba a detecta un boto drentando awanan territorial di Aruba. Autoridad a activa mesora y a logra intercepta un boto yegando Aruba for di direccion di Venezuela cu intencion pa drenta na un sitio ilegalmente.
Wardacosta a duna e boto ordo pa e para, pero e capitan a opta pa nenga e ordo y purba burla di autoridad door di aumenta velocidad. No a keda wardacosta nada otro di uza nan arma reglamentario, den forma di los tira di advertencia. E ora si e capitan a tuma nota cu e cos ta serio y a opta pa para pa e defensornan di ley por a subi abordo.
Abordo di e boto tawatin cinco hende homber di nacionalidad Venezolano. Ningun por a mustra un permiso legal pa ta na Aruba y mirando e direccion den cual nan tabata nabegando, ta obvio cu no kier a drenta Aruba via waf, pa “klaar in” na Migracion.
Wardacosta a detene e capitan di e boto y a entreg’e na recherche di Unit Georganiseerde Criminaliteit di polis. E caso ta den pleno desaroyo y e investigacion lo sigui su curso.
Ta bon pa splica cu e echo di ta ilegal na Aruba ta un fayo administrativo, pues no tin consecuencia penal. Ta entrega e cinco hombernan den man di Guarda nos Costa pa regla nan deportacion. Pero transporte di hende ilegal, siendo capitan, ta un delito penal, conoci comone ley di “Menselhandel en Mensensmokkel” pa cual tin castigo largo di prizon. Den bida real, mayoria di e capitannan aki ta haya castigo pero ta expulsa nan for di Aruba cu un ordo pa nan no drenta nos isla nunca mas. Asina nan no mester sinta castigo den KIA cu ta yen, pero akibanda nan no por yega nunca mas tampoco!
