December a yega y por cuminsa sinti e ambiente di Pasco y Aña Nobo mas y mas. A pesar di tur circunstancia, varios comision a dicidi di haci nan maximo esfuerso pa asina duna un toke magico n’e temporada aki.
Un di e comisionnan aki ta di Sero di Jan Flemming, caminda cu for di 2012 nan a bin ta traha di manera incansabel pa asina cu e temporada dushi di Pasco y Aña Nobo yega, nan por duna e pueblo di Aruba, un bunita cero dorna di luz di color. Albertico Flanegin, di Comision Seroe di Jan Flemming a indica cu despues di dos aña nan ta activo bek cu cendemento di luz na Seroe di Jan Flemming.
Tur aña Comision Seroe di Jan Flemming ta bin c’un tema pa cu nan decoracion, pero pa un of otro motibo, no tur aña ta logra esaki. Maestro di Ceremonia di e aña aki tabata e Eltiene Yarzagaray cu tabata entreten’e e publico y e banda Azucar tabata esun encarga pa cera e anochi bunita aki.
Mas aleu, Flanegien a indica cu den siman tur dia lo tin un persona encarga cu e cendemento di luz y den fin di siman tambe y ainda ta trahando ariba un forma di entretenimento p’e fin di aña.
Albertico Flanegin, di Comision Sero di Jan Flemming ta desea henter e pueblo di Aruba, un felis dianan di fiesta.
Despues di un periodo dificil den cual mundo a pasa durante dos aña, tur hende ta buscando nan caminda bek pa celebra e dianan di fiesta manera cu semper tabata e custumber.
