Pa hopi hende, e temporada di mas dushi ta e temporada di Pasco. E temporada unda cu ta para keto un rato n’e nacemento di Nos Señor HesuCristo. Varios entidad religioso riba nos isla ta organisa diferente actividad pa cu e temporada aki.
Asina tambe diasabra anochi Good Samaritan Christian Center (GSCC), situa den Avenida Milo Croes, a organisa nan evento di Pasco ‘Christmas Village’. Ta algo cu e centro religioso ta purba tur aña, segun Frank Daal, Pastoor di GSCC. E idea ta pa trece e rason pakico tin un temporada di Pasco. Mundo ta bibando den temponan hopi dificil, norma- y balornan ta bayendo atras. Un di e norma- y balornan cu ta hopi importante ta e nacemento di HesuCristo. Segun Mateo28:19, e tarea ta pa bay y hiba e bon nobo y haci tur e nacionnan discipulonan di HesuCristo. No ta forsa niun hende pa haci esaki, pero ta anima hende pa haci esaki, segun Daal.
E nacemento di Hesus tabata hopi importante pa humanidad, sino humanidad tabata perdi ainda. Y esey ta purba haci, a traves di arte, obra di man, cuminda y diferente cos, ta purba trece hende hunto y a traves di esey trece e mensahe dilanti. Tabata tin gaita pero den e palabranan tabata tin un mensahe di e bon nobo di HesuCristo den dje. Y esey tabata e intencion di e evento aki.
