Autoridadnan concerni a haya nan mes un biaha mas obliga pa cera e crusada cu luz di trafico na Palm Beach despues di e accidente pisa e siman aki.
Manera ta conoci, na e crusada aki na momento cu e luznan no ta funciona, e accidentenan ta sosode diariamente, tin biaha mas cu un pa dia. Durante cu Aruba a cera frontera, no a tende mucho di e crusada aki pa motibo di e traficacion limita di automobilistanan den e area ey.
Sinembargo na momento cu a kita toque de queda y frontera a habri, por a constata mas movecion y e accidentenan a cuminsa tuma luga. Autoridadnan a dicidi di cera e crusada aki y e chauffeurnan mester uza e mesun sistema cu tabatin anteriormente ora cu e cera esaki pa motibo cu e luznan di trafico no ta funciona.
A keda demostra cu luznan no ta factibel mas na e crusada aki simplemente cu nan ta mas for di funciona cu nan ta trahando. Riba dje, piesanan pa luznan di trafico ta dificil pa haya y si haya nan mes, ta tarda pa nan yega Aruba.
E hecho aki ta demostra cu mester busca un solucion mas factibel pa e trafico di Aruba awendia, probablemente un of otro tipo di rotonde. Pero e ta algo cu mester di dje urgente, pasobra e accidente cu daño material ta grandi y cu herido. Principalmente pa e victimanan.
