Diasabra marduga, den careda di 3:00 am, Deaxo Croes a drenta lama di Boneiro pa asina cuminsa cu su hazaña di Crossing for Prevention. Deaxo ta landando desde Boneiro pa Corsou y e ta haci esey pa crea conscientisacion pa prevencion di cancer.
Crossing for Prevention ta referi na Crossing for Hope. Na 2018 Deaxo hunto cu otro cuater landado di Aruba Dolphins, a landa di Venezuela pa Aruba y a colecta 123.000,00 florin pa Koningin Wilhelmina Kanker Fonds Aruba. Awo e ta bolbe haci esaki, pero e biaha aki pa tres institucion di cancer. E institucionnan aki ta uno di Boneiro, Corsou y Aruba, respectivo. Ta trata di e institucionnan CORESA Foundation Aruba, Caribbean Prevention Center Curaçao y Kanker Fonds Bonaire. E hazaña aki a bira mas special pa Deaxo despues di a haya sa cu su tanta tin cancer.
El a cuminsa landa dje parti zuid di Boneiro direccion Corsou. El a sali cu boto fo’i Harbour Village di Boneiro y bay banda di e hutjenan di esclavo pa topa cu su mama, kende lo ta wardand’e na Corsou. Na su salida tabatin persona cu a warda su salida.
Pa e hazaña aki, tres kayak ta compañ’e di cerca. Ta calcula cu e lo yega den dies pa diescauter ora n’e parti oost di Corsou. E ta yega n’un area priva, pero ta bay tin un auto ta ward’e pa asina hib’e Caracasbaai na The Pier pa dun’e bonbini.
E fundacionnan
ARUBA – CORESA
CORESA ta para pa Colorectal Screening Aruba, cual ta un fundacion basta hoben lanta door di tres dokter specialista yiu di tera, Christopher Franca, Justin Smit y Marcel Ho-Kang-You. Cancer di tripa, tambe conoci como cancer di colon, cancer colorectal of cancer di rectum, ta un enfermedad cu ta causa cu e celnan den bo colon of rectum pa crece na un manera incontrolabel. Ta importante pa comunidad sa cu, cu solamente un screening bo por salba bo bida pa motibo cu e screening lo por detecta algo cu tin e potencial di bira cancer den futuro y por elimin’e na tempo. Cancer di tripa ta den e top tres tipo di cancer mas comun na mundo. Pa e motibo aki mester bin mas esfuerso den nos comunidad pa educa nos poblacion tocante e riesgo, sintoma y tratamentonan. Pa mas informacion por bishita www.fundacioncoresa.com. Informacion bancario ta: Fundacion Coresa, Aruba Bank, #6031390190.
BONEIRO – KANKERFONDS
Kanker Fonds Bonaire ta funciona cu tres miembro di directiva y shete persona cu ta duna man riba base diario, tur di forma boluntario. Ta ofrece informacion na pashent y ex-pashent di cancer riba, entre otro, con pa sigui biba cu e malesa, ademas di participacion den actividad social y conscientisacion. Entre otro ta organisa lectura cu ta habri na henter comunidad. Na momento c’un persona sa cu e ta pashent di cancer, e por inscribi mesora como cliente di e fundacion. Kanker Fonds Bonaire ta traha completamente riba donacion. Nan tin un sede ubica na caminda La Union 11, ex-cas di pareha Palman cu Fundashon Mariadal a hereda y a pone na disposicion di e fundacion. Pa mas informacion por bishita: www.kankerfondsbonaire.com. Informacion bancario ta: Kanker Fonds Boanire, Maduro & Curiel’s Bank Bonaire N.V. #101191602 of RBC Bank N.V., #84000000180282769.
FUNDASHON PREVENSHON CURAÇAO
Riba iniciativa di professor Dr. H.M. Pinedo y difunto Lionel Capriles, e fundacion aki a lanta dia 23 di december 2008 cu e meta di percura cu mas tanto persona posibel na Corsou ta haci e saminacion necesario pa detecta y consecuentemente trata cancer na tempo. Den sociedad cu Gobierno di Corsou, e sector comercial y otro organisacionnan ta yega na mas tanto persona den grupo di riesgo y yuda pa nan presenta na nan cita di screening. Esey ta posibel door di, entre otro, un acuerdo cu e registro civil di Corsou (Kranshi) cu ta suministra un bista di e personanan di cierto edad. Ta comunica cu nan via post of telefonicamente, brinda servicio gratis di transporte pa y for di e screening y asistencia den pospone e cita pa otro fecha. Ta traha activamente riba screening pa cancer di pecho, di matris y di colon. Pa mas informacion por bishita: www.fundashonprevenshon.com. Informacion bancario ta: Fundashon Prevenshon, Maduro & Curiel’s Bank (MCB), #21684310.
Deaxo Croes
Deaxo Croes a yega di landa desde Venezuela pa Aruba cu e meta di recauda fondo pa fundacion di cancer. Deaxo a landa na 2018 di Venezuela pa Aruba un total di 42.42 km den dies ora y binti minuut. Awo ta bolbe haci esey, pero e biaha aki a pone como meta pa landa di Boneiro te Aruba. Meta tra’i esaki ta pa recauda fondo pa tres fundacion. A yama e hazaña aki Crossing for Prevention.
E ta haci esey p’e fundacionnan CORESA (Aruba), Stichting Kanker Fonds (Bonaire) y Fundacion Prevenshon (Corsou). Diasabra den ora di marduga tur cos a cuminsa momenot el a sali fo’i Boneiro pa Corsou. Diadomingo ta landa pa Aruba desde Corsou.
E cobertura di Crossing for Prevention ta posibel danki na Aruba Bank, Bite Communications, Cr3@te, Gomez & Coffie, Sun Bum y Central Hotel Bonaire.