Un Reflexion pa nos cuida nos Matrimonio, Famia, y bida di nos Prohimo.
Ta parce manera no ta tur hende conoce e profundidad di historia di David y Betsabe, hopi ta tume como un simpel historia di bijbel, pero si bo medita den e palabra di Dios, bo por ricibi gran experiencia di bida, for di e historia aki y siña respeta y cuida bida di hende.
2 Samuel capitulo 11 y capitulo 12.
Tur cos a cuminsa ora cu Rey David mester a bay guera hunto cu su hendenan pero e a keda cas, Y e a lanta for di su cama bay cana rond riba su dak di cas,y for di e dak e a mira un muher ta baña, e muher tabata masha bunita pa mira, esey ta nifica cu para riba su dak e mira den privacidad di otro hende y a codicia cos di otro hende.
Anto e a manda busca informacion tocante di e muhe, y un hende a bise: No ta Betsabe yiu muhe di Eliam, casa di Urias e heteo, sabiendo tur esey David den su posicion di rey a manda busca e muhe y drumi cune. Y despues e muhe a manda bise mi ta na estado.
Esey ta un hecho di adulterio cu su consequencia.
David a bisa manda busca Urias pa mi, pa papia cune con ta bay cu e guera y despues David a mande, bay su cas y laba su pianan y hasta a dune un regalo, pero Urias no a bay su cas, e a keda drumi na porta di David su cas hunto cu e otro sirbidornan.
Ora David a haña sa e a bolbe yama Urias , y David a bise no ta for di un biahe bo a bini dicon bo no a bay bo cas, y Urias a bise con ami ta bay mi cas, bay drumi cu mi esposa, mientras otronan ta den sabana, pa bo bida, y bida di bo alma, lo mi no haci e cos aki.
Aki nan nos por mira e lealtad di Urias contra falsedad y traicion di David.
Mainta David a scirbi un carta y mande cu Urias mes pa Joab bisando, pone Urias den e fila di e bataya mas fuerte y hala for di dje pa asina e wordo herida y mata. Y esey a sosode durante di e bataya Urias a wordo mata.
David a haci Betsabe vuida, pa cubri su inmoralidad, y sconde su pica.
Despues David a manda busca Betsabe y a casa cune .
Ma e cos cu David a haci tabata malo den bista di Dios.
E consequencia di David su pica tabata desastroso pa su famia, e yiu cu a nace a muri, su yiu homber grandi Absalon a bira completamente contra dje, y su consehero Ahitofel a bira su peor enemigo, pasobra segun historia Ahitofel tabata famia di Betsabe.
Tur esaki a sosode pasobra David a despresia e palabra di Señor y haci malo den bista di Señor.
Dios a pordona David su pica na momento cu e a repenti, pero e consecuencia tabata doloroso pa su cas y su famia cu por poco a causa perdida di su propio bida.
Dios kier mustra cu kico cu nos por haci, of den cual posicion cu nos ta, si e cos ta malo den bista di Dios, Dios lo sake na cla, no ta importa si bo ta rey, of esclavo.
Dios kier pa tur matrimonio wordo respeta y honra, y tur famia wordo respeta,no ta importa si un hende ta pober of rico e mester wordo respeta.
Sinceramente, Pastor Marcel Balootje.
