Manera a anuncia, hues tabatin te cu awe pa tuma un decision y e decision a cay na fabor di Ministerio Publico. Sospechoso den caso Flamingo, ex-Minister Otmar Oduber, mester bay bek den detencion preventivo na KIA.
Na comienso di siman tabatin un audiencia caminda tanto Ministerio Publico, como abogado di Otmar Oduber a presenta nan argumentonan. Oduber y su abogado tabata mustra y a expresa nan mes di forma hopi sigur, sinembargo, hues a mir’e di otro manera. Corte Superior a determina cu tin suficiente ernstige bezwaren di estafa ora di uitgifte di terenonan erfpacht y nombramiento di ambtenaarnan spirito.
“Esey si mi no sa ainda” tabata contesta di vocero di Ministerio Publico riba nos pregunta di ki dia of ora e ex-politico mester bay bek KIA of si polis lo busc’e pa hib’e bek prizon. Di otro banda, e sospechoso mes tampoco no sa ainda con e proceso aki ta hinca den otro. “Awo t’ey tende”, el a contesta ora a hacie e mesun pregunta. “Mi ta hopi descepciona y e caso lo no keda t’e aki”, asina e sospechoso Otmar Oduber a bisa nos un rato pasa, drentando oficina di su abogado, mr. Vito Carlo.
A investiga ex-minister Otmar Oduber, den su funcion di Minister di Infrastructura den Gabinete Wever-Croes I, entre aña 2017 y 2019. A deten’e cu ocho acusion contra dje pero ora di pidi su encarcelacion a presenta solamente dos y sin inclui e “dossier” completo.
