Riba diaranson 24 di juni 2020 a tuma luga un manifestacion cu a escala y yega na sakeo y destruccion. Durante di e situacion penoso aki a detene diferente sospechoso (34 persona riba 24 di juni y 21 persona riba 25 di juni).
E personanan aki a haci nan mes culpabel na destruccion, cendemento di candela y robo. Cuerpo Policial Corsou (KPC), Ministerio Publico (OM) y Recherche Samenwerkingsteam (RST) a uni forsa pa identifica e otro sospechosonan y persigui esakinan penalmente. E mensahe mester ta cla cu actonan criminal no ta aceptabel.
Riba e atardi di 24 di juni, un cantidat grandi di ladron a drenta den diferente establecimento di negoshi cu e meta pa saca y bay cu tur e inventario di e negoshinan aki. Hopi di e sakeonan a keda filma entre otro pa camaranan publico of pa otro ciudadanonan cu despues a comparti esakinan via medionan social. Ademas, por reconose cara di e personanan responsabel pa e sakeo aki hopi bon riba e imagennan aki. Polis lo studia e imagennan aki y lo publica esakinan pa asina por saca afo ken ta e malechornan aki ta. Pa aworaki lo mustra e imagennan aki di tal forma cu no ta mustra caranan completo.
Polis ta haci un yamada urgente na e personanan aki cu a haci nan mes culpabel na e destruccion y sakeonan aki pa nan entrega nan mes di forma boluntario na polis y tambe pa trece loke a bay cu ne durante di e sakeo. Den caso di e personanan aki lo evalua posibilidad pa un areglo (‘afdoneing’) cu ta cuadra.
Personanan cu no ta duna oido na e peticion pa entrega nan mes y cu polis mes lo busca y detene, lo haya un castigo mucho mas pisa. Den e caso ey, den consulta cu Ministerio Publico polis lo bay over na publica imagennan completo di e sospechosonan. Chens ta grandi cu e personanan aki den e caso ey lo enfrenta un persecucion penal. Ya combersacionnan ta tumando luga cu Corte den Prome Instancia pa atende e casonan aki cu prioridad den e asina yama ‘snelrechtzittingen’.
Finalmente, KPC, RST y Ministerio Publico ta haci un yamada na tur ciudadano cu por ta testigo di un di e sakeonan, cendemento di candela y/of destruccion, y cu tin grabacion di esakinan of cu por ta na altura di ken ta e autornan intelectual di e sucesonan aki, pa meld esaki na polis. Por haci esaki entre otro pa medio di e number anonimo 108. Tambe ta posibel pa manda video of potret di e sucesonan riba e number di app 5242480.
E informacion aki ta valido tambe pa sucesonan similar cu a tuma luga despues di dia 24 di juni.
