Ultimo dianan aki e tema di aumento di castigo pa pedofielnan ta masha den noticia. Comunidad ta reaccionando rabia y disgusta contra castigonan, cu den boca di pueblo ta considerando, mucho abou. Abogado mr. Chris Lejuez a bisa awe cu e leynan ta bon, pero ta e “orientatie punten” mester adapta. Y pa logra esey mester convence Corte Comun di Caribe Hulandes, cu su oficina principal na Corsou.
E asunto principal den e caso aki ta e castigo cu na final di dia e acusado ta haya. Locual ta sosode ta cu tin ley y ta keda na cada Hues pa aplica ley na su manera. Por cambia ley cuanto cu nos kier, pero realidad ta cu un Hues imparcial lo dicidi riba e peso di ley y den esey e tin e libertad pa interpreta e ley na su forma di mir’e.
Locual si ta sosode ta cu Corte Comun di Caribe Hulandes (Hof) cu su oficina principal na Corsou, ta determina locual ta yama “Orientatie Punten”. Esey ta e maneho cu Corte ta hiba den cierto casonan. Asina por ehempel Corte por dicidi cu den caso di cierto crimennan of delito, lo aplica tal castigo, aunke cu kisas e castigo maximo ta mucho mas. Cu e maneho aki, Corte ta purba mantene un maneho uniforme entre tur e 6 islanan den Caribe Hulandes.
Pues pa awor, en bes cu pensa den presiona Parlamento pa cambia ley, e abogado ta conseha comunidad pa purba convence Corte Comun di Caribe Hulandes pa adapta nan “Orientatie Punten” y asina cambia e nivel di castigonan cu ta duna acusadonan den caso di abuso sexual, sea cu mucha of adulto. No ta mal idea pa purba haya un audiencia cu Presidente di Corte Comun ora e ta na Aruba y asina splik’e e sentimiento cu ta biba den nos comunidad. E intencion di Corte semper ta pa por compronde nos comunidad.
