Un rato pasa Departamento di Salud Publico (DVG) a anuncia cu Aruba a alcansa 100 caso positivo di Coronavirus. Un aumento di tres caso positivo compara cu ayera, unda a cera dia na 97 caso, pa dos dia consecutivo. Remarcabel si ta cu mas pashent a recupera completo, for di 51 ayera pa 68 awe. E cantidad di casonan negativo a subi di 1381 pa 1404, mientras cu hendenan den cuarentena a keda na 65 awe, mescos cu ayera. Na tur e testnan cu a haci a subi di 1478 pa 1504. Interesante y mas importante awor ta cu e casonan activo ta sigui baha, for di 44 caso ayera pa 30 caso awe. Bisando esey, tin mas hende curando cu ta infectando!
Pa awor, tanto Merca como Hulanda e ultimo oranan ta papiando di reapertura di nan economia, pero den forma limita y pocopoco. Aruba probablemente tambe lo cana e caminda aki, pero cu e cautela necesario pa evita un di dos ola di plamento di e virus, ora habri Aeropuerto atrobe. E hecho cu Merca y Hulanda ta papia di reapertura no kiermen cu ta habri aeropuerto pa buelonan internacional, pues lo mester analisa e situacion “dia pa dia” pa mira ki ora ta ideal pa Aruba tambe cuminsa reactiva nos economia, cu awor aki ta pasando dor di retonan nunca bisto!
