Ta parce cu awor, despues di simannan di Toque de Queda (TDQ) cu awor porfin e mensahe a yega na e pueblo of cu nan ta compronde of cu ta respeta e ley di urgencia aki. Ayeranochi pa awe mainta tabatin un record di cantidad minimo di detencion, banda di cayanan keto y cu yamadanan limita na Polis pa asistencia.
E prome detencion tabata den e bario di Moko na Noord, pa exactamente 9:06pm. Polis a topa cu un auto marca Toyota modelo Yaris color blauw scur, numera A-57054, maneha pa un hende muhe. A splik’e cu 9:00pm tur hende mester ta na cas y como tal ta deten’e y hib’e dilanti un Fiscal suplente pa atende riba su comportacion y pa cuminsa cana e proceso penal, cu manera anuncia adelanta, tin bin cu multa entre un mil pa dies mil florin. Cu su laptop den man a hinca e chauffeur femenino, cu contrario na tur otro, no mester a haya boei na su mannan, den e van di detenidonan maneha pa CEA.
Un rato despues, pa 9:20pm a tuma luga e di dos detencion, e biaha aki den Mandolinstraat, poco panort di Pacifico Dakota. Ey Polisnan patruyando den cayanan di Dakota a topa cu un homber moviendo na pia. A baha deten’e mesora, mustr’e riba su derechonan y a transport’e pa Warda di Polis pa e pasa dor di e mesun procedura penal.
Normalmente tur esunnan cu detene anochi/marduga, ta keda cera te mainta despues di 6:00am. Esey ta pa por caba cu e documentonan legal y pa evita cu ta laga e sospechoso den libertad y despues di un rato Polis ta bolbe top’e riba caya y cu chens cu ta bolbe detene. Remarcabel ta cu algun hende no ta siña y ta cay cera mas di un biaha den e ultimo simannan aki. Asina tin un solo adicto ambulante cu tabatin suerte di cay cera 3 biaha pa TDQ. El a bisa Polisnan cu nan lo cer’e mil biaha mas pasobra e no tin cas pa biba toch, caya ta su cas.
Cu e realidad di reduccion di movecion riba caminda den oranan di anochi, combina cu no tin nada di haci tampoco riba caya debi cu tur negoshi, bay, restaurant y trucknan di cuminda ta cera, ta mustrando cu comunidad di berdad ta “keda cas” entre 9:00pm y 6:00am.
“Cuerpo Policial ta sumamente contento cu e cifra di detencion ta bahando durante TdQ. Nos ta pasando den temponan dificil pero hunto nos lo sali di e situacion aki. Ban keda positivo y pronto e temporada aki lo ta tras di lomba. Ban uni como pueblo y asina nos sali di e situacion aki. HUNTO NOS T’E SOLUCION”, asina Liliana Rasmijn, di e departamento di Comunicacion, Informacion y Prevencion di Cuerpo Policial Aruba, a duna di conoce.
