Fundacion pa Talento Musical “Donny Laclé” a presenta un biaha mas su Concierto Dominical den “Café Musical” na Biblioteca .
E organisador a haya cooperacion di diferente talento musical cu a trece un programa atractivo cu cay na agrado di tur esnan presente.
E concierto a habri cu actuacion di Coro da CaPo bou guia Catherine Provence. E coro a presenta canticanan local manera “Chanita”, “Fiesta den cura” y entre otro tambe dos cantica na Frances y un na Ingles, Mayoria di e canticanan nan a canta a capella, esta sin uso di instrumento musical. E presentacion a termina cu dos piesa di Padú del Caribe, toca riba piano “à 4 mains” door di Catherine Provence y Rob Rombout. Un bunita presentacion cu a haya su aplauso mereci
Durante e pausa cu a sigui e caha di glas a pasa rond, den cua nos bishitantenan a haci un donacion generoso pa e Fundacion Donny Laclé por yuda nos hoben talentonan musical cu nan lesnan di musica. Despues nos a canta Happy Birthday pa un fiel bishitante di nos concierto durante añanan largo. Sra. Bep Bastiaanse siman pasa a cumpli 88 aña y a trece un bolo hopi grandi pa tur presente por a fiesta cu ne.
Nos Primerisima Sharon Rose tabata e siguiente artista, y entre otro a canta “Un potpuri di wals”, “Ta Pakico”, “Na mi un chens”. E cantica na Hulandes ”Ik hou van jou” a cay den bon tera cerca e publico. Nan a forma coro cu Sharon Rose y a bati man pa compañ’e.Su tremendo stem y e forma hopi expresivo di presenta su canticanan, a encanta tur esnan presente, kendenan hasta a pidi pa mas.
Den e parti final a toca turno na Los 3 y amigonan, bou guia di Erck Uchtmann. Erick ta un bon amigo di Concierto Dominical. Si nos tin un problema pa yena a programa, Erick ta cla pa yuda. E biaha aki atrobe. Nan a cuminsa cu e cantica “Na Caminda di Santa Rosa y Aruba, pa despues bay bek den tempo di aubade. E MC tabata sa cu sra, Bep ta gusta e cantica “Schoon is de West” y a pidi Los 3 y amigonan pa cant’e y toc’e pa sra. Bep. Ariba tur mesa tabatin un papel cu e letranan y tur hende a canta “Schoon is de west”, loke tabata un bunita sorpresa pa sra. Bep.
E grupo a sigui despues cu e canticanan “”N’ ta kier mi kier,” “Toch mi sa” y otronan cu a yena e pista di baile den un rato. E alegria riba cara di tur esnan presente tabata bisa nos cuanto nan a disfruta di henter e mainta aki,
Cada musico of grupo a haya un certificado di aprecio pa nan participacion.
E siguiente Concierto Dominical lo tuma lugar diadomingo, dia 24 di juni.
