Den un publicacion di ayera diabierna, Matutino Diario a skirbi riba pagina 12 “Un malesa a habri cortina di imperialismo Chines”. Na e momento aki prensa mundial ta carga di articulo tocante Coronavirus. Hopi articulo den prensa local y internacional, hopi articulo no ta cuadra cu berdad. No tin prueba di locual ta skirbi. No ta sigur na unda e virus a origina. Por ehempel potretnan den e articulo ta potret saca hopi, pero hopi aña pasa, entre otro 2013. NO ta di awor! E articulo ta basa riba suponencianan y di loke corant ta kere cu ta berdad. Leu for di esey! Corant mester busca e informacion completo, corecto y cu prueba. No loke medionan ta tira na laira.
Den un comunidad chikito manera Aruba, e tendencia di e articulo ta carga cu discriminacion contra e grupo etnico Chines. Banda di ta mancha e grupo Chines como portado di malesa, e ta yuda publico aleha su mes di e Chinesnan. Nos ta spera cu Diario sa di busca e berdad. Y no pone den corant un opinion cu ta loke e ta kere cu e mester ta.
Comunidad Chines ta masha indigna cu e articulo menciona, ta hopi rabia, ta sinti hopi falta di respet y perhudica. Ya caba den algun supermercado ta haci bofon di e Chinesnan y ta ofende e Chinesnan den e supermercado, restaurant y tiendanan. E grupo Chines ta sinti’e hopi ofendi cu e contenido di e articulo. Publico ta tira palabra pa Chinesnan, sin cu e tin arte ni parte den e asunto aki. Ta perhudica China como pais, su habitante y su representante naci den otro pais.
TA BASTA!
Refleha si China mes kier perhudica su mes cu e virus. Consecuencia ta su prohibicion di aglomeracion di hende, cera scol y fabricanan. Un economia sin produccion y sin entrada financiero. Ta ken ta corta su nanishi? China di su parti ta haci hopi esfuerso pa contene e virus, pa e no plama.
Nos ta spera y warda un disculpa pa e contenido di e articulo cu a sali publica dia 28 di februari 2020 riba pagina 12 di Diario.
Den nomber di Chinesnan na Aruba cu ta hopi rabia, indigna, perhudica y ta sinti nos mes ofendi.
