Awe mainta Minister Plenipotenciario Guilfred Besaril a reuni cu e conocido compositor y cantante Antoni Gario di e banda Le Groove. E ta e Rey di Soca di carnaval 66 y lo ta presente den Aruba Dag diadomingo dia 29 di maart proximo. Esaki despues cu e proceso di invitacion y aceptacion no a bay sin polemica y discusion. Awe tanto e mandatario como e musico a duna otro man y hunto a invita tur Arubiano na Hulanda pa atende na celebracion di Aruba Dag 2020.
“Probechando cu mi ta na Aruba mi a dicidi di sinta cu Antoni Gario pa nos bebe un koffie, combersa y resolve e diferencianan cu lo por tabatin. E tabata un combersacion ameno y mi ta contento di por a shake hands cune y pone tur diferencia y problema tras di lomba. See you in Holland “Pink Fellow”, asina Minister Guilfred Besaril a skirbi riba su pagina di Facebook despues di e reunion cu Gario.
Di otro banda, Antoni Gario a skirbi riba su Facebook cu “E magia di 2 bon kop’i koffie cu un tiki honing tira aden! Por, por. Ta kier mester kier. Topa nos na Hulanda. Chips Ahoy, Rotterdam. NL. E ‘Rubiano”. Despues di e reunion, Antoni Gario a entrega Minister Besaril dos T-Shirt di e celebracion di 20 aña di Le Groove. El a bis’e cu un ta pa e mandatario y e otro ta pa su distinguida señora. Riba e shirt ta skibi “Ros te cos” y tambe “Diki t’e triki”.
E evento di e aña aki a haya e nomber di “Aruba Dag…Back 2 the Beach” y ta tuma luga diadomingo dia 29 di maart 2020 den Rotterdam Ahoy. Como artistanan invita lo tey Broederliefde, Buleria di Aruba, Ataniro, Musical Time, Sky, Steve Andreas, Karixon, Roots Palmera, On Time Music, Jerremy Garcia & Aymar Torres, Popcorn Dancers, Gran Dama Cultural, Grupo Stimami y awor tambe Le Groove for di Aruba. Ta intencion pa hiba e Rey di Caiso y di Tumba tambe pa toca hunto cu Le Groove riba scenario.
