Contrario na e peticionnan regular cu sa drenta Aruba pa pidi “Asilo” pa e situacion na Venezuela, di cual mayoria bes no ta bini na remarca, diamars ultimo a presenta un caso masha peculiar. Den cierto sentido, autoridad local mes a faya, lagando 6 turista for di Afghanistan drenta Aruba SIN Visa, bou di e pretexto cu nan ta di transito. Awor tin 4 di e Afganonan wanta na Warda nos Costa pendiente un decision di e comision di Asilo, mientras cu un mama y su baby ta hospedando den City Hotel den Caya Betico Croes. Ta teme cu Hues Comisario lo tin chens di laga henter e famia bay liber, debi na erornan cometi den e procedura aki na Aruba.
Tabata diabierna cu a yega Aruba un famia di 5 adulto y un baby, tur cu paspoort di Afganistan. Ta un famia cu a gasta un dineral na pasashi pasobra e vuelo tabata for di Arabia Saudita pa Marocco, sigui pa Brazil, pa despues bula pa Panama, pasa Aruba pa sigui pa Surnam y di Surnam a regresa Aruba cu intencion pa sigui cu conexion pa Colombia. Pero aki ta caminda cu Migracion Aruba a comete un eror grave dor di a permiti e famia sali for di Aeropuerto siendo cu nan mester a sigui di transito directamente pa e vuelo di Avianca. A laga nan sali completo cu maleta y tur cos pa por bay subi e vuelo mas atardi cu Avianca.
Ley ta bisa cu un pasahero por keda te cu 24 ora di transito sin mester visa, contal cu e ta keda den aeropuerto. Asina cu e pasahero sali for di Aeropuerto e lo mester un visa, aunke ta un temporario. Parce cu e unico autoridad cu por duna dicho permiso ta Departamento di Relacionnan Exterior di Reino Hulandes. Y esaki no a sosode!
Nada di transito y no a sigui pa Colombia
Contrario na nan pasashi, e grupo aki no a regresa Aeropuerto pa sigui cu nan vuelo for di Aruba pa Bogota, Colombia. Di e forma aki Migracion a duna nan acceso na nos pais na un forma ilegal. E realidad ta cu mester a laga nan pasa mesora pa e siguiente aerolinea pa por sigui cu nan vuelo pendiente pa Colombia. E diferencia entre nan y otro pasahero ta cu nan ta procedente di un pais cu ta rekeri Visa pa por drenta Aruba, locual nan no tin. Den e tipo di situacionnan asina ta rekeri extra atencion di nos autoridadnan den cuida nos fronteranan “cera”.
E ilegalnan a cay inocentemente den man di Polis
Tabata diamars ultimo cu e grupo aki tabata canando den Wilhelminastraat cerca di Warda di Polis di Oranjestad y tabata actua straño. Polis a pensa cu nan ta perdi of desorienta y como tal a acerca nan pa papia cu nan. A nota cu tabata masha dificil pa comunica pasobra nan no ta papia Ingles, ni Hulandes, ni Spaño. Un di nan ta papia un Ingles masha limita y kibra y cune, haciendo seña a logra saca afor cu for di diabierna cu nan a yega pa diamars, cu TUR di nan a perde nan paspoort! Ya eynan e scenario a cambia y a haya un idea cu nan a opta pa intencionalmente keda atras na Aruba. Tambe a nota mesora cu Migracion a haci un eror di laga nan drenta Aruba mes siendo no tin Visa. Pero pa haci e situacion mas complica, e 5 adultonan na Warda di Polis a solicita pa asilo den forma oficial.
A dicidi di aplica “Schiphol Model” pa prome bez
Aunke cu for di aña pasa a adapta maneho cu ta papia awendia di e “Schiphol Model”, es decir cu asina cu un stranhero solicita pa asilo, cu Gobierno tin e opcion pa wanta e persona den un centro apunta dor di e Minister di Husticia pa asina warda riba un contesta. Na Hulanda nan ta haci esaki na Aeropuerto mes, unda a traha un centro di detencion pa atende cu e aplicantenan di asilo. Den caso cu e contesta ta positivo, e ora nan ta haya acceso na e pais pa por biba y traha. Na Aruba esaki ta pa prome bes cu ta aplica e maneho aki. E hecho cu a detene nan despues di pidi asilo awor ta den discusion cu si esey por ta motibo pa un Hues Comisario “toets” con e procedura a bay y tin chens cu a personanan aki ta bay liber. Cu un limitacion di idioma, ta cuestiona con nan lo por biba y maniobra riba nos pais. E solucion ta pa manda nan bek, cu un pasashi cu ta basta costoso tambe pa yega te Afganistan bek.
Expertonan na cas persigui politicamente
Ora sigui e desaroyonan aki di cerca, caminda cu na un forma sistematico ta cometiendo erornan grave cu nos leynan di admision y di asilo, ta cuestiona si esunnan na cabes conoce nos leynan y nan aplicacion y nan consecuencia. E Gobierno aki a persigui Gerald Vingal y Elio Blijden. E ultimo a bay Corte y a gana su caso y awor ta na cas cobrando sin por traha. Vingal ta poni den un comision den banda ey sin mucho responsabilidad siendo cu legalmente ainda e ta Director di Migracion. Ambos tin un experiencia masha amplio den e ramo aki pero pa rasonnan politico a opta pa hala nan un banda. Probablemente e mandatario tin miedo pa nan strob’e politicamente, sin cu e ta realisa cu e dosnan cu awor ta na cabes ta dunand’e mas dolor di cabes ainda!
Afganistan
Republica Islamico di Afghanistan ta situa na Asia y ta un di e poco paisnan cu mester visa na practicamente henter mundo. E tin frontera cu Pakistan, cu Iran, cu Turkmenistan, Uzbekistan yh cu Tajikistan, mientras cu na e otro banda e tin frontera cu China. Na aña 1996 e pais a pasa bou control di e grupo Islamico fundamentalista “Taliban” cu a maneha e pais den forma totalitario pa 5 aña largo. Na e sucedidonan di 9/11, e Gobierno Mericano a interveni y a core cu e Talibannan for di poder, aunke cu te awe ainda nan ta controla un parti significativo di e pais. Afganistan ta un republica cu un Presidente unitario, pero cu un nivel halto di terorismo, pobresa, mal nutricion di muchanan y corupcion. E tin e di 96 economia mas grandi na mundo, cu un GDP di 72.9 biyon Dollar Mericano. Afganistan ta midi 652 mil km2 y tin u populacion di riba 32 miyon habitante.
