Ya caba den luna di maart e comunidad Chines a yuda Fundacion Pa Nos Comunidad pa material pa traha paketenan di ayudo. E siman aki otro container a yega.
Dialuna den oranan di merdia pa atardi a logra saca un container di comestibel cu comerciantenan Asiatico a pidi pa yuda comunidad den tempo di crisis di Covid-19. Segun William Cheng, di e organisacion di comerciantenan Chines, nan ta spera cu pa otro siman yega un container mas cu comestibel. Pues en total tin tres container caba den e prome tres lunanan di e crisis.
E containernan ta contene tur cos basico cu famia mester manera azeta, aros, diferente tipo di pasta, lechi, buscuchi, bonchi, cuminda bleki. Pues henter e container ta contene comestibel. Nan a dicidi di traha cu Fundacion Pa Nos Comunidad, ya cu nan tin e lista di esnan den necesidad.
Minister Xiomara Ruiz Maduro, di Finanza, tambe tabata presente y a splica cu for di momento cu a acerca e comunidad, Chinesnan a duna nan palabra di lo coopera y Gobierno a duna nan cooperacion pa loke ta e parti di “invoerrechten”. Tur esaki a keda a palabra den reunion unda cu wholesalernan tambe tabata presente.
Gianaika van der Biezen a bisa cu inicialmente nan tabatin un lista largo di 2000 famia cu nan ta yuda. E container cu a yega awo lo por yuda 800 famia cu nan pakete mensual.