E habitante di Tanki Leendert Judella Boekhoudt su cana a yena, manera e dicho crioyo ta bisa, y a dicidi di haci un denuncia publico. Tur dia hobennan cu ta practica “motorcross” den e veld patras di e club di train judo na Tanki Lendert ta baña nan cu stof.
Ta algo cu nan a bin ta bibando cu ne pa un tempo caba y a yama Polis varios biaha pero nan no ta ni presenta tin biaha. Awe cu nan a dicidi bay publico cu e denuncia, Polis a presenta. “Nos kier un solucion,”e ciudadano a bisa.
Casi tur atardi un grupo di mucha hoben ta bin scramble cu brommer, causando molester grandi na tur esnan bibando den e bisindario. “Nan ta yena nos pata pata di stof. Ta bin un cortina di stof cu nos no por soporta. Bo ta bay cerca e mayornan y nan no ta haci nada.” E mayornan y nan famia cu ta biba banda panort no ta sufri di e stof cu ta bay den tur e casnan banda pazuid.
Ta trata di un tereno publico cu awo ta basta limpi y e muchanan ta haci uzo d dje. Hasta DOW a acerca pa haya un solucion pero nada. Nan kier pa Polis of DOW haci algo pa e muchanan stop di cross eytras y pa nan tin un bida normal.