Un hende por gusta un cantante, gusta su forma di presenta e cancion, y namora di su cancion. Pero hopi bes e persona cu ta presenta e cancion no ta esun cu a compone of aregla esaki. E artistanan tras di un cancion hopi biaha no ta haya e admiracion cu nan merece. Den festival Un Canto pa Aruba su Himno y Bandera sigur tin un compositor cu a sobresali: Lurena Schwengle.
Diasabra ultimo tabatin e final di e festival den categoria adulto, cual no a conoce un final aña pasa. Pa compensa e participantenan, no a inclui un seccion di adulto e aña y a laga e finalistanan di aña pasa competi pa e premio di 2021.
E compositor triunfado e aña’ki pa hopi no ta conoci, pafo di e mundo di musica, pero e ta responsabel pa e composicion ganado y esun cu a sali na di dos luga den e festival dedica na Aruba su Himno y Bandera.
Lurena a sinti cu for di prome bes cu el a cuminsa skirbi, e hendenan a gusta su trabou y a cuminsa acerc’e. Tin cancionnan cu e compositor aki ta skirbi pensando kenden(nan) lo por present’e di e miho forma posibel. Den e casonan asina, e mes ta presenta e cancion na e cantante en cuestion pa interpreta su composicion. “Cu transcurso di tempo, esnan cu gusta mi estilo, ta acerca mi y asina mi a traha cu diferente hende conoci na Aruba,” Lurena Schwengle a bisa.
A pesar di e temporada cu Aruba ta pasa aden, e ta kere cu e Dia Nacional ta un dia pa celebra, teniendo cuenta cu medidanan di siguridad pa salud. Por core rond y duna balor na loke Aruba tin.
Dany Koolman no ta desconoci aki na Aruba. E ta un compositor y areglista. Aunke cu su obranan ta participa den diferente festival, esun di Himno y Bandera ta keda algo special, cu ta “touch” curason di tur hende “pa cual e tension y presion ta extra”, Koolman a comenta. P’esey e ta pone hopi di su fantasia den e produccionnan pa Himno y Bandera.
El a apela pa mustra yiunan e importancia cu un pais tin su mesun identidad y pakico mester respeta esaki.
Si amor ta core ta den bo sanger y sinti bo conecta, y bo lanta bista y mira e bandera, bo mester sinti e emocion, Lurena Schwengle a finalisa bisando.
E resultado completo di categoria adulto tabata:
Na di 5 luga:
Jason Kelly y Jo-Ann Werleman : A pesar di diferencia (Sabor Crioyo)
Na di 4 luga: Margaret Marin : Duna amor (Alma Folklorico)
Na di 3 luga: Nicole Martines-de Kort (Curason pa Aruba)
Na di 2 luga: Argeline Henriquez, Emilenne Boekhoudt y Jerusha Arends : Aruba nos ta (Sabor Crioyo)
Ganado Absoluto: Jair Vesprey y Rodrick Franken : Ora Sanger Yama (Tipico Buleria)
