Un dama hopi bebi cu su Toyota SUV color geel a core manera loco y burachi prome cu su careda a caba. E ta un comerciante local naci na Venezuela. E ta papia Spaño y Ingles ora cu polis a detene. E ta naci na 1960. E tabata core cu su auto y a kibra un cura di cas na Westpunt. Pa ora cu e doño a core sali e dama chauffeur a ranca auto core bay.
E auto tabata tur kibra dilanti. El a core te Tierra del Sol y eynan el a lora bay aden. El a pasa e seguridad na porta di salida y casi a ranca seguridad. Mesora e seguridad a bati alarma na polis y nan mes a sali su tras. El a dal den Tierra del Sol tambe den un birada. A mira con parti di e auto a keda atras varios caminda durante e huida. Finalmente seguridad di Tierra del Sol a logra blokia e auto. Polis a yega y detene.
El a bay den transporte special pa detenido na Strand Politie. Eynan subfiscal a mir’e y mustra riba e proceso cu ta sigui. E tabata medio keha di dolor. Asina mas cu un biaha e subfiscal a puntre si e kier ambulance of yudansa medico. El a nenga tur biaha. El a admiti di a dal basta cerbes. Despues di e proceso di subfiscal a bay cu ne warda di Shaba.
Eynan e specialista di trafico a bay atende cu ne. A purba saca afo kico a pasa cu el a dal core bay y causa un situacion fastioso p’e. E auto Toyota Cruiser color geel a keda den beslag mientrastanto y cu takelwagen a bay cune for di Tierra del Sol.
