Lastimamente, entrante dialuna, 8 di november, 2021 y te cu 4 di januari, 2022 LdS no por brinda servicio di laboratorio na pashentnan di AZV. LDS lo keda brinda servicio na e clientenan priva (esnan cu ta paga pa nan testnan).
E motibo pa esaki ta door cu AZV ta aplica un presupuesto maximo anual pa cada laboratorio priva y LdS a alcansa su presupuesto di 2021. LdS, como un laboratorio medico ISO acredita y un di e provedor di mas grandi di servicio di laboratorio na Aruba, claramente ta lamenta esaki y no ta di acuerdo cu e decision.
E logica di e presupuesto ta cuestionabel, ya cu LABHOH no tin un presupuesto maximo, y mas ainda un presupuesto anual no ta yuda AZV spaar placa door di cera LDS. Un pashent lo simplemente haci uzo di servicio di laboratorio na un otro laboratorio. E unico resultado di esaki ta cu pashentnan no lo por uza servicio di laboratorio di nan escogencia, algo contra e principionan basico di AZV. Laboratorionan priva cu ta resalta den calidad y servicio na cliente ta wordo castiga pa nan excelencia door di AZV.
LdS a trata di convence AZV pa aumenta e presupuesto di 2021, pero esaki sin resultado. Aunke e decision ta completamente for di nos alcanse, LdS kier disculpa pa e inconveniencia na nos fiel clientenan y ta pidi cordialmente pa uza un otro laboratorio durante e periodo aki.
Pa cualkier pregunta, please tuma contacto cu LdS na: [email protected].
Laboratorio di Servicio ta continua cu nan servicionan di calidad halto na Aruba y haci nan maximo esfuerso pa por duna un servicio excelente, den vecindario di oficina di dokter, pa asina logra yuda diagnostica y controla malesanan of condicionnan, den un manera confiabel y sigur.
Laboratorio di Servicio ta ansioso pa brinda servicio na tur pashent di AZV atrobe otro aña!
Dr. Robert M.F. Wever
Clinical Chemist/ Medical Director
