Riba un dia manera awe, pero 210 aña pasa, a lansa e prome gritonan pa independencia di Colombia for di Spaña. Tur aña, rond mundo Colombianonan ta sigura pa e dia no pasa sin mas. Pero e aña aki, debi na reglanan estricto di distanciamento social, a cancela mayoria celebracion, por lo menos esunnan publico. Pero na Aruba, e Colombianonan a opta pa celebra adelanta, desde diasabra caba.
Mientras cu Consulado General di Colombia na Aruba a opta pa no tin ningun ceremonia oficial cu entregamento di ofrenda floral, manera ta organisa tur aña, gruponan social si a organisa diferente encuentro cu a bay compaña pa hopi musica, cuminda crioyo y a sirbi como un bon oportunidad pa Colombianonan por a topa cu otro despues di como 4 luna cera den cas.
Desde ayera diasabra caba a start cu eventonan na Reflections Bar & Restaurant y awe a continua na Aruba Waterpark y na La Barra entre otro. Ey a celebra nan independencia cu hopi ambiente, musica, cuminda y alcohol cu no por a falta.
Celebracion “20 de Julio” di Colombia
E independencia di Colombia tabata e proceso cu a caba cu e dominio di e imperio Spaño riba teritorio di e pais. E proceso a inicia 210 aña pasa, na 1810 y a caba na 1819, pa independisa e teritorionan cu tabata yama e tempo ey Nueva Granada. E proceso aki tabata parti di e varios gueranan hispanoamericano, den henter e continante Americano, motiva pa e guera di Napoleon cu Spaña. E movimento pa logra independencia a cuminsa cu proclamacion di huntanan di Gobierno, lidera pa Anto io Nariño y Camilo Torres Tenorio. Dia 20 di juli 1810 a declara independencia di Spaña, pero a reconoce dia 7 di augustus 1819 ora cu e ehercito Republicano, bou comandante Simon Bolivar a gana e bataya contra e Spañonan pa crea Gran Colombia, na honor di Cristobal Colon, cu a inclui Colombia, Venezuela y Ecuador. Na 1830 a separa e paisnan for di otro y a crea e ora Colombia.
Tocante Colombia
Colombia ta situa den e parti nort di Sur America; Na e parti nort e ta na frontera cu lama Caribe, na nortwest e tin frontera cu Panama, na parti zuid e tin frontera cu Ecuador y Peru, na parti oost e tin frontera cu Venezuela, na e parti zuidoost e tin frontera cu Brazil y parti west cu ocean Pacifico. E ta consisti di 32 departamento y cu capital Bogota, e ciudad mas grandi di e pais. E pais ta midi 1,141,748 kilometer cuadra, e ta e di 4 pais mas grandi di Sur America despues di Brazil, Argentina y Peru. E ta e di 25 pais mas grandi na mundo cu mas di 50 miyon habitante y considera e di tres economia mas fuerte di e continente Sur Americano.
