Operacion grandi riba lama pero Wardacosta: “Geen commentaar”

For di awe tardi caba Wardacosta di Caribe Hulandes, via nan Helicopter, a solicita pa Aruba “stand by” pasobra nan lo bin nos isla cu 1 of 2 persona herida for di riba lama. Nan ta den un operacion y ta rekeri atencion medico urgente. Mesora a activa Ambulancenan y a prepara Hospital, pero un rato despues a cancela e “stand by” y a informa cu nan lo bay Corsou. Mas informacion no a duna autoridadnan local.

Mirando cu Wardacosta ta resorta bou di Cuerpo di Marina Real, ta custumber cu Ministerio di Defensa di Reino Hulandes ta hiba un maneho masha discreto cu informacion na media. Ta solamente si nan gara un boto cu pisca abordo nan ta cla pa saca potret y manda media, pero ora cu nan mes ta envolvi den un operacion grandi den cual tin posibel morto(nan) y herido(nan) ta prefera di keda keto y percura pa mas speculacion.

Cynthia Devere di Wardacosta di Caribe Hulandes, staciona na Corsou, a bisa un rato pasa cu e no por ni confirma ni desmenti cu a sosode un accidente riba lama di cual tin morto- y heridonan. Su unico palabra na nos colega di 24ora.com na Corsou tabata “Geen commentaar”.

Prensa di Corsou, mescos cu di Aruba, a informa for di Aeropuerto riba yegada di e Helicopter di Wardacosta. Na Aruba nos a informa cu tabatin un preparacion grandi pero a cancel’e pasobra e heridonan tabata rumbo pa Corsou. Pero nos coleganan na Corsou, cu a sigui nos informe, a presencia e Helicopter baha pero sin ningun pashent ni ambulance, ni nada. Si a nota cu e “duikteam” di Marina Real a subi abordo di e Helicopter y a sali mesora bek. A informa Toren di Control cu nan ta rumbo pa un operacion na Aruba.

Aki na Aruba e Helicopter a informa Toren di Control cu e lo ta bulando abou cerca di costa noord-oost di nos isla, sin specifica ki operacion e ta eherciendo, kico a pasa of kico nan ta buscando. “Esey ta normal. Vuelonan Militar ta masha discreto, hera nan no ta ni bisa Bo nada ms cu nan ta den Bo espacio aereo”, asina un fuente for di Toren di Control di Aruba a conta nos.

Aruba den estado di alerta pa busca victimanan riba lama. Ultimo momento a scoge pa hiba e heridonan pa Corsou. #noticiadendesaroyo

Posted by 24ora on Sunday, July 19, 2020

Rumornan persistente na Corsou y na Aruba ta menciona cu lo a sosode un accidente den lama entre Aruba y Corsou cu un helicopter di un embarcacion militar di Reino Hulandes. Ta papia cu posiblemente e Helicopter lo mester a “ditch” y cu tin dos morto y dos herido. Te na e momentonan aki, ningun autoridad ni na Corsou y ni tampoco aki na Aruba no por splica e comunidadnan kico ta pasando. Un maneho pa cu prensa masha asocial y sigur no apto pa aña 2020!

Noticia relacionaMas for di e autor