“Den media nos ta haya sa cu e Presidente di Parlamento a tuma un iniciativa riba su mes pa cambia e ley di ombudsman”, Gerlien Croes, parlamentario di Fraccion A.V.P., a cuminsa na bisa. El a continua vociferando cu e cambio no ta ancra e defensor di pueblo den un constitucion. Pues lo nombr’e cu diesel voto y na momento cu nan desea nan ta kit’e tambe!.
Gerlien Croes a sigui splica cu a politisa e proceso ainda mas pasobra si ancr’e den constitucion lo tin mester di dos tercera parti di Parlamento pa por haci un cambio. Awo ta pas’e cu 11 voto cu ta duna na e oportunindad pa haci y deshaci pasobra e ta un landsverordening.
E preocupacion ta keda mescos. E parlamentario a sigui bisa cu ta nombra un ombudsman y na momento cu e bira mucho critico por kit’e cu diesun voto. Asina ta haci e proceso dependiente di politica na momento cu kier pone presion.
Durante e debate a bin argumento dilanti bisando cu Raad van Advies lo tin un rol den e nombraciony retiro. “Raad van Advies no ta mara bo na su conseho”, Croes a enfatisa. Pues si Parlamento kier tuma un desicion e ta djis tum’e.
Locual ta mas doloroso, pa Gerlien Croes, ta cu desde 10 di maart 2022 Parlamento tin un comision institui di ombudsman. Presidente di Parlamento no a yama ningun reunion, locual el a haci despues di 10 di maart tabata traha riba e cambio y acerca su partner den coalicion Raiz. Segun a compronde Raiz a join pero cu peticion pa no acerca ningun otro hende den Parlamento. Den otro palabra nan tin mayoria pues nan mes ta “wheel and deal”.
Esaki sigur ta un falta di respet pa pueblo pasobra un ombudsman mester ta u topico cu tur 21 parlamentario tin cu dialoga den Parlamento. “Nos ta keda wak cu ta politisa tur sorto di cos na Aruba”, Croes a finalisa bisando.
