Aruba semper tabata un isla trankilo cu masha poco criminalidad. Pero pocopoco esey a cambia. Actualmente casi diario tin un of otro problema ta sosode, cu antes bo no tabata tende mes di dje.
Esey ta loke a pasa cu Conrad Granger, biba na Jan van de Biesstraat, cu a conta na e reportero di 24ora/TREMPAN. El a bisa cu semper e bario unda cu e ta biba tabata un bario trankil, pero si e mester bisa cu ultimo temponan aki el a ripara cu cosnan a cuminsa cambia.
Y su trankilidad a yega na su fin, despues cu e tin 40 aña ta bibando n’e mesun adres.
Diamars mainta el a lanta y a haya su auto vandalisa. Segun Granger, tin tur indicacion cu esunnan cu a haci esaki tabata kier a bay cu e auto. El a yama polis cu a responde di biaha pa nan bin haci nan investigacion na su cas.
El a sigui bisa cu ta un lastima con tur cos a cambia. Como pensionado, placa no ta yega. E vandalismo di su auto ta trece gastonan inespera pa su persona. Loke hopi hende no ta compronde ta cu costo di bida ta caro y di e placa di pension cu e ta cobra, no ta resta nada pa spaar pa cualkier eventualdiad. Y e daño haci na su auto, cual awendia no ta un luho mas, pero un necesidad, ta trece gastonan innecesario p’e.
Awo e lo tin cu cana e caminda di seguro pa wak si seguro lo cubri e gastonan p’e, cual e ta duda ya cu su auto no ta sigura All Risk, pero tercera parti.
Por ultimo, Granger a pidi pa Gobierno pone extra vigilancia riba caya. Den dia ta keto, pero asina cu anochi cera y tur hende bay drumi, ta como sifuera cu tur e malhechornan ta subi caya pa comete nan fechorianan.
