Mando Policial anterior a faya pisa despues cu a bandona e warda di Polis na Playa. Esaki ta e warda di polis mas bieu, situa den Wilhelminastraat 40. E warda di varios piso caminda pa algun decada polis a funciona.
Door di falta di mantencion a spart e warda for di otro y manda e departamentonan pa diferente localidad den Playa y otro districto. Despues di bandona e warda, e polisnan di caya y dos departamento mas a traha den e edificio dilanti di e warda bieu.
Esey ta edificio di FCCA. Awor cu a bandona e warda ey tambe e zona a keda bandona pa autoridad. Mesora e adictonan ambulante a tuma over Wilhelminastraat 40. Polis a gara adictonan conoci di husticia hortando koper den e edificio. Pero apart di e adictonan cu a tuma over, e polisnan a bay laga atras un cantidad grandi di armanan confisca. Masha hopi machete, cuchiu di tur size uza pa menasa y hincamento. Hopi otro cos uza como arma den un of otro caso penal manera bate di baseball, klop na cantidad tambe tabata benta pa nan cuenta den un warda totalmente bandona.
Ora cu nan a realisa finalmente ki desaster e cos aki ta causando despues di bandona, a cuminsa busca pura un compania pa activa mesora cu limpiesa. Weekend a mira con tabata druk cu limpiesa sacando tur cos benta afo. Masha hopi documento y proces-verbaal di casonan serio tabata benta na diferente piso den e warda. Interogacion completo di diferente delito pisa tabata skeiro den e wardanan. Un warda cu diferente entrada cu bentananan kibra. A compronde cu e yamada di urgencia a bin di polis mes of e ordo di mando policial nobo pa saca tur cos benta afo. Lo destrui e documentonan priva cu tabata benta den diferente piso. Lo bay kima tur den insinerado. Algun aña caba polisnan a bandona e warda y tur e tempo ey e documentonan aki a keda benta pa nan cuenta. Relatonan anual di cuerpo policial tambe tabata gespart.
Awo finalmente a logra prepara tur cos y ya caba den apenas dos pa tres dia a saca ocho baki di binti yarda yena cu sushi. Ainda falta kisas dos pa tres baki mas prome cu finalmente e trabou termina y cu e warda bieu a keda liber di arma y documentonan priva di hendenan cu a yega di cay cera. E edificio ey ta den mannan priva awo y parce e ta un monumento.
Nan lo cuminsa drecha e edificio pronto. Kico nan lo kier bay haci cu ne ainda no ta conoci. A mira si cu a cuminsa midi pafo pa tin un bista riba e grandura na meter cuadra. Spera cu e trabounan ranca sali ya asina e edificio no bira un peliger mas grandi. Awo caba a mira con bentananan a cuminsa cay.
