Ayera tardi un auto a alcansa un ciclista na altura di e crusada di Alhambra Casino. E victima a resulta seriamente herida, cu hopi sla na cabes. Lamentablemente ambulance a tarda pa yega. Un Dokter pasando pa casualidad a baha brinda asistencia medico y e tambe a pidi pa ambulance yega cu mas urgencia. Ora a yega Hospital porfin, situa 100 meter leu di e desgracia, a constata cu situacion di e victima ta hopi serio y a intern’e den Intensive Care Unit (ICU).
E victima, C. de Lisle di apenas 21 aña di edad awor ta luchando cu su bida den Hospital. Su situacion ta critico y hopi delicado. Specialista di ICU, Dr. Uiterbeeck hunto cu Neurologo, Dr. Keuter, ta brindando cuido special na e pashent, haciendo tur posibel pa surpasa e retonan cu tantisimo sla na cabes ta causa ora di un accidente fuerte asina.
Informacion na e sitio ta indica cu e bicicleta posiblemente a sali dilanti e auto. Otro testigonan a divulga cu e auto tabata coriendo cu un velocidad hopi halto.
Di otro banda, chauffeur di e auto awor ta den un problema serio. El a alcansa un ciclista cu un auto “ilegal” riba caminda, pasobra e auto no tin ningun documento, no tin number di auto, no ta gekeur y tampoco tin seguro. E number riba e auto ta pertenece na un otro auto. E chauffeur a bisa cu el a cab’i spuit e auto y a core sali un rato pa hiba placa pa un amigo. Pero ta net den e rato ey el a causa un accidente hopi serio, lagando un victima den estado critico na Hospital.
Mayornan di e victima pa colmo tabata cu vakantie na Hulanda. A manda yama nan urgente y awe caba a yega Aruba pa t’ey band’i nan yiu den e momentonan dificil aki. Palabranan di forsa y cu nos bon Dios por obra den man di e Dokternan pa cura e ciclista di e slanan ricibi den accidente di trafico ayera.
