Tur aña den e di dos aña di estudio, e studiantenan di Universidad di Aruba di e Facultad Finansa, Economia y Mercadeo ta ricibi e oportunidad di forma parti di e modulo Proyecto Social, caminda lo tin cu traha den un grupo di 6 pa 7 studiante unda nan tin e privilegio di contribui cu nos sociedad door di yuda un fundacion.
E grupo ta encera: Kelin Acosta, Thayrenne Becker, Tatiana Jimenez, Manuel Paula, Franchelina Paula y Sharyll Tromp.
E motibo dicon e grupo aki a escohe e fundacion Sea Bunita Sea Bo Mes ta paso nos ta sinti hopi identifica cu e mision di e fundacion caminda cu e balornan di integracion, educacion y inclusion pa e muchanan/hobennan cu Down Syndrome y Autismo ta hopi importante pa resalta.
Ademas, nos a encanta cu e fundacion ta organisa un fashion show tur aña unda e miembronan di e fundacion ta modela hunto cu e artistanan conoci riba Aruba.
E fundacion Sea Bunita Sea Bo Mes tambe ta traha bunita calendario caminda riba e calendario bo por mira e miembronan di e fundacion hunto cu nan mayornan.
Mirando cu e temporada di Pasco ta na porta, e studiantenan conhuntamente cu e directiva di e fundacion a bin cu e idea pa organisa un cena di pasco pa e miembronan di e fundacion. E motibo di e evento aki ta paso e lo ta prome biaha cu e miembronan di e fundacion lo disfruta di un cena di pasco.
Nan a plania un cena di pasco na Divi Tamarijn. Durante e anochi aki e muchanan/hobennan a disfruta di un anochi ameno y magico caminda nan a come, papia y balia y Santa Claus tambe tawata presente pa por a entrega regalo na cada mucha/hoben.
Grupo organisatorio kier a extende nan gratitud na e siguiente organisacionnan cu a yuda nos tremendamente cu e evento: Divi Tamarijn All Inclusive pa sponsor nos e luga y cena pa e muchanan/hobennan; Kristie’s Jewels cu a sponsor nos e fondo pa cumpra e regalonan pa e muchanan/hobennan, decoracion y pa e Santa Claus; Maggy’s y DA Drogist Aruba cu nan a sponsor nos e regalonan; e empleadonan cu a yuda nos durante e anochi y pa e Santa Claus cu a yuda anima e evento y entrega e regalonan na e muchanan/hobennan.
Tambe nan kier a gradici na e directiva di e fundacion, Sra. Marianela y Mr. Hans Geerman y e mayornan di e muchanan/hobennan pa e oportunidad y confiansa den e grupo di studiante pa por a organisa e evento.
