Diamars 29 di juni 2021, Christle Nieuw a bira e di 47 graduado di e programa ‘Organization, Governance and Management’ (OGM) na Universidad di Aruba. Christle a defende su tesis dilanti di e comision di graduacion cu tabata consisti di Caroline Daal-Hart di Fundacion pa Nos Comunidad, Luciano Milliard y Birgit Kreykenbohm di Universidad di Aruba. E presentacion y defensa di e tesis a tuma luga dilanti di famia, studiante, interesadonan, profesional den e area aki y docente di Universidad den e Aula di Universidad di Aruba.
Christle a haci exploracion den un investigacion den un topico hopi relevante pero no mucho studia na Aruba. E titulo di su tesis ta ‘Two Birds, One Stone: reducing Food Waste while Feeding Aruba’. Christle a explora den e sector turistico y ‘Food and Beverage’ (F&B), si un ‘food sharing app’ ta algo cu por beneficia Aruba y cua rekisito ta necesario pa por introduci un aplicacion asina.
El a compara diferente ‘food sharing app’ cu ta ser uza exitosamente na diferente pais rond di mundo. Tambe el a studia teoria relevante pa e topico aki y investiga ki idea nobo diferente experto for di e sector di ‘F&B’ na Aruba tin. Christle a entrevista diferente experto y siña di nan experiencia, reto, factor pa exito den nan tereno y kico nan deseonan ta riba e tereno aki pa Aruba. Christle a scoge e topico aki pa su tesis pasobra manera e crisis di COVID-19 a demostra, tin falta di cuminda y falta di acceso na cuminda pa hopi hende na Aruba.
Christle su tesis ta hopi relevante y valido pa Aruba, pasobra Aruba su sector turistico y specialmente ‘F&B’ ta grandi den economia y den e mesun sector aki desperdicio di cuminda ta tuma luga. COVID-19 tambe a pone enfasis riba e importancia di un bon infrastructura y colaboracion entre fundacion manera Fundacion pa Nos Comunidad hunto cu hotel, restaurant y supermercado. Un innovacion manera un ‘food sharing app’ por yuda den e reduccion di desperdicio y contribui na siguridad di cuminda pa pueblo di Aruba.
Universidad di Aruba, particularmente e departamento di ‘Organization, Governance and Management’, ta felicita Christle cu e logro aki y ta desea tur clase di exito cu e Master na Wageningen Universiteit (Hulanda).
Pa mas informacion tocante e programa OGM, bishita e website di Universidad di Aruba na http://www.ua.aw/OGM, e pagina di Facebook di OGM cual ta @UniversityofArubaOGM y pagina di Instagram di OGM cual ta @ogm_ua.
