Durante e temporada aki desde comienso di dianan di fiesta, tin conscientisacion tur caminda pa no bay tras di stuur ora cu bo ta bebe alcohol. Toch sin embargo tin algun cu no ta scucha y ta dicidi di tuma chens riba esaki anto bay stuur burachi, asina poniendo bida di otro hende na peliger.
Manera por ehempel e joncuman den e caso aki na unda cu diasabra marduga polis motorisa a para un V-2034 cu tabata core bastante malo.
E chauffeur tabata riba paranda coriendo rib’e caretera di ex-Sasaki weg. Polis a haya nan mes obliga pa para e auto. Ora cu a bay controla e chauffeur, a resulta cu ta bao di influencia di alcohol.
E persona a keda deteni y transporta pa warda di polis. E no tabata su so riba trip. E dos amiganan cu tabata den e auto a keda na pia mirando cu nan a detene e chauffeur. E auto a keda para banda di caminda y te aki e trip a yega pa nan.
