HIAS a lansa un campaña titula ‘Chamo, mi ta bo ruman’. E ta un campaña contra di xenofobia (discriminacion) pa trece conscientisacion pueblo di kico e ta.
Como parti di nan campaña contra di xenofobia, HIAS kier trece un mensahe di conscientisacion n’e pueblo di kico ta xenofobia y e daño y consecuencia di esaki pa e migrantenan. Xenofobia ta un palabra cu hopi hende ta scucha pero kisas no ta compronde su nificacion. Manera nos tur sa, e palabra ‘chamo’ ta un palabra hopi uza pa e Venezolanonan. Cu e frase aki, ‘Chamo, mi ta bo ruman’, cu na spaño ta nifica, mi amigo, mi ruman. E ta un combinacion di e dos idiomanan, e harmonia entre e dos cultura- y nacionalidadnan.
Xinara Raymond, Community Based Proteccion Manager, a splica un poco di kico ta xenofobia y e consecuencia cu esaki lo por tin pa e persona migrante. Xenofobia ta ora c’un persona local di un pais ta discrimina un migrante. E discriminacion aki ta pa falta di conocemento y falta di comprondemento. Pero tambe door cu e persona ta diferente, riba tereno di idioma, cultura y su apariencia.
Mester traha den aceptacion, inclusion y respeta na un y tur. Na momento cu compronde un situacion den e contexto di Aruba, e ora por combati e problema cu solucion. HIAS Aruba no kier combati e situacion aki cu un agresion of cu un boso ta haciendo algo fout. Pero kier trece conscientisacion n’e pueblo, di kico e ta y con pa trece un solucion pa xenofobia.
Tambe Raymond a splica cu HIAS ta trata primordialmente cu personanan Venezolano cu a yega n’e isla na un forma iregular, buscando un miho calidad di bida y refugio, es decir, nan a entrega un peticion di asilo. HIAS ta duna nan asistencia humano, ta yuda nan cu cuminda, cu asistencia pa bay scol, asistencia medico.
Asina mes cu HIAS ta duna tur e asistencia aki, toch nan mester carga tambe e consecuencianan di xenofobia. Esaki ta afecta e migrante mentalmente, cual ta un carga hopi pisa pa nan mes. Tur asistencia cu ta duna nan, no ta suficiente pa nan por deal cu e situacion aki. E migrante mester por sinti cu ta ricibi nan na un forma digno cu respet. E manera cu por haci esaki ta door di papia cu e pueblo cu mester ricibi nan.
