E deficit di Corsou pa 2018 di ANG 53 miyon ta menasa di sigui aumenta y sali considerablemente mas halto cu loke a premira te poco tempo pasa ey. Pa 2019 Colegio di supervision financiero di Corsou y Sint Maarten (Cft) ta tene cuenta cu un deficit di mas di ANG 100 miyon pa motibo di contratempo financiero.

Cft ta constata cu Corsou ta tumando e medidanan necesario pa mehora cobramento di impuesto. Na mes momento, ainda nan no a tuma medida eficaz pa baha gasto. Bahamento di gasto ta necesario y urgente, tanto pa reduci e deficitnan cuantioso como tambe pa tene e riesgonan di disminucion di e reserva di divisa di Corsou bou di control.

Economia di Corsou a bin ta krimp durante varios aña. Culpabel di esey ta e situacion na Venezuela, pero tambe e falta di reforma economico structural ta un obstaculo pa crecemento di economia di Corsou. Gobierno di Corsou ta gasta demasiado –e gastonan total di e sector colectivo di Corsou ta monta na no menos cu 51 porciento di e PIB- y Corsou ta haya su mes den e situacion preocupante y insostenibel di krimpmento economico, deficit riba e cuenta coriente y deficit den e presupuesto di gobierno. E pais ta para dilanti di un tarea dificil pa pone finansa na ordo y implementa reforma economico. Gobierno di Corsou, e dunadonan di trabou y e sindicatonan tin un responsabilidad conhunto pa percura pa realisa e tarea ey.

Cftl ta premira cu, pa motibo di contratempo, e deficit pa 2019 lo por sigui aumenta te na mas di ANG 100 miyon. E medidanan decreta anteriormente cu e intencion di reduci e deficit, manera e paro di obligacion y e supervision financiero previo ta resultando insuficientemente efectivo. E mehoracionnan den e maneho financiero tambe ta kedando atras. Corsou no por warda mas pa tuma medida pa pone su finansa na ordo y pa ocupa su mes cu reduccion di e gastonan gubernamental inmediatamente y cu atencion permanente. Bahamento di gasto no ta solamente necesario pa reduci e deficitnan y pa no laga e debe sigui aumenta, sino tambe e ta contribui na mehoracion di e situacion vulnerabel di disminucion di e reserva di divisa di Corsou.

Durante e bishita di Cft na Corsou a papia tocante e urgencia cu cual mester implementa e diferente medidanan. Den e caso aki a presta atencion special na medida destina pa controla e gastonan di cuido y prevision di behes, pasobra den e proximo añanan ta spera aumento rapido di e deficitnan den e fondonan social. Cft ta preocupa tambe pa e gastonan di e hospital nobo HNO. Cft ta pidi Corsou pa tuma e medidanan necesario –tanto pa loke ta control di e gastonan di transicion y di financiacion di HNO como realisacion di economisacion den cuido– pa no laga e gastonan di cuido aumenta innecesariamente.

Na october 2018 Corsou a yega na un acuerdo cu Cft pa mehora e maneho financiero y traha pa yega na un declaracion aprobatorio di accountant pa e cuenta anual di 2021. Ehecucion di e trayecto di mehoracion ey ta kedando atras y mester atend’e energicamente.

Cft a haci un bishita na Corsou di dia 17 pa 19 di juni y a tene combersacion cu Gobernador, Ministro di Finansa, Conseho di Ministro, e Comision di Finansa di Parlamento, Refineria di Kòrsou, e partnernan social (VBC, Camara di Comercio y e centralnan sindical), Servicio di Impuesto y Banco di Seguro Social (SVb).

Comments

comments