Mama ta denuncia EPB San Nicolas

Un mama sumamente rabia a tuma contacto cu 24ora.com pa haci un denuncia contra EPB San Nicolas, cu ta nenga su yiu e derecho di participa den un CP.

Sra. Marisol a splica cu e documentonan di su yiu di 19 aña ta den proceso na DIMAS. Su yiu mientrastanto ta bayendo EPB San Nicolas. A resulta cu e seguro recientemente a caduca y e no tin e recursonan pa mesora cumpra un seguro nobo.

Segun e ta splica, ora cu a yega momento di cuminsa haci CP, nan a bin descubri cu e seguro a vence, pa cual scol no ta permiti e mucha muhe aki participa na e test central.  “Con por ta posibel. Tur mucha y hoben tin derecho pa bay scol. Mi ta compronde cu e seguro a vence, pero mi a haci un oferta na nan. Mi a bisa nan traha un carta unda mi ta firma cu mi ta exonera nan di cualkier incidente cu por tuma luga na scol. Ami mes lo carga cu e gastonan. Tur cos, basta cu mi yiu por participa na e CP. Pero nan no a permiti esey, ni pa e subi tereno di scol,” e mama, kende tabata hopi agita a conta. El a agrega cu ta mas studiante a wordo nenga pa haci CP y a manda nan cas.

Nos a combersa cu director di EPB San Nicolas. El a confirma di tin e caso en cuestion. Tur scol ta exigi pa e studiantenan ta inscribi na AZV. Den caso di stranheronan, cu nan permiso no ta cla ainda, nan mester tin un seguro priva. Den caso di e studiante aki, a resulta cu su seguro a caduca y no a cera un seguro nobo. “Nos no por permiti ningun studiante riba nos tereno di scol sin un seguro. Nos ta responsabel pa tur loke cu pasa cu e hobennan mientras cu nan ta na scol,” Erwin Lopez a comenta. Esaki, el a agrega, no tin di haber cu violacion di leerplicht of no, pero cumpli cu exigencianan di un scol.