Centro Man na Obra ta un di e departamentonan cu tabata tin un opendag y directora general di SVGA, Els van Homelen, ta masha contento cu hopi hende a bin pa mira ki tur e clientenan ta haci aki.
Van Homelen ta sigui splica cu e aña aki nan ta existiendo 55 aña y hopi biaha ta realisa cu hopi hende no sa ki trabao nan ta haciendo. A pensa e ora kico nan ta haci. A organisa e dianan di bishita y a duna un tiki mas promocion pa e dianan. Den pasado a yega di haci opendagen, pero masha tiki hende tabata bishita.
E aña aki a pone hopi cos den prensa pa duna pueblo un tiki mas informacion. Por ehempel ora pidi un ayudo, hende sa puntra ken ta Man na Obra, ken ta SVGA, etc. Mester traha riba nan PR y esaki ta un bunita oportunidad pa esnan cu tin interes pa wak kico nan ta haci cu personanan cu un limitacion, e ora por bin wak.
Esey ta hopi importante pa mustra comunidad kico tur e clientenan por haci. Eynan tin clientenan cu ta traha den jardin, nan mes ta mantene esaki, nan ta traha bela, ta haci auto limpi, tin grupo ta bay Kooyman pa traha eynan. Tin grupo pafo cu ta haci un trabao na Fantastic Garden. Pero tambe nan ta empaketa habonnan pa hotel. Asina por wak cu e clientenan por haci hopi cos cu ta cumbini comunidad tambe. Esey ta hopi great pa mustra cu berdad tin e interes pa hendenan cu ta bin wak e trabao cu nan ta haci.
Tur e ariba menciona ta ehempelnan cuanto cos e clientenan por haci y nan gusta haci cu e guia cu ta duna nan. “Esey si nan tin mester. A base di e nivel cu nan tin, mester tin un guia banda di nan. Cu e guia adecuado, nan por logra hopi cos. Esey ta conta pa Pasadia Briyo di Solo tambe. E ta un otro nivel di cliente cu tin un condicion mas serio. Eynan e clientenan tambe ta traha den jardin, ta yuda laba paña, ta traha hopi di nan cuido personal, riba obra di man. Cada cliente tin cu haya e oportunidad pa crece segun su capacidad. Esey ta loke kier stimula mas cu ta posibel,” sra. Van Homelen a splica.
E retonan
Segun van Homelen, e reto di mas grandi ta e aspecto financiero. Nunca e subsidio ta suficiente. A papia hopi biaha den prensa pa por duna e personal e pago cu nan merece. Ta luchando hopi y ainda nan no ta full cla pa por realisa esey. Ta un lucha hopi grandi, Ta pidi hopi di e personal cu ta traha eynan cu hopi amor. Pero kier duna nan tambe e salario cu ta pertenece na esey. Ta un lucha cu nan ta hibando pa hopi tempo. Esey ta un reto hopi grandi como directiva, pa deal cu gobierno.
Por lo general, nan tin nan meerjarenplan. Nan ta kere den dje cu mester keda traha pa mehora e cuido. Semper tin cos pa mehora y mester ta realistico. Loke awe ta funciona, kisas mañan bo mester cambia. Esey ta algo cu nan ta realisa nan mes y cada departamento tambe ta trahando riba su meerjarenplan. Ta purba pa traha hopi planmatig, cu metodonan.
Segun van Homelen, pa hopi aña caba, cada cliente tin su ondersteuningsplan. Pero awo kier haci’e miho ainda, pone exactamente na unda, ki area di desaroyo, unda e ta den su desaroyo. Pa asina por sigui mas miho. Manera di augustus pa mei kico e cliente a logra. Mester por pone esaki por escrito pa por prueba na e mayornan y famia kico tur nan a logra. Asina por sigui siña tambe con por bay mas dilanti ainda cu e persona. Tambe nan tin nan dossier digital, cu nan por uza mas eficiente pa bay maximo riba e desaroyo di e cliente. Ta algo cu ta bezig den tur departamento. Van Homelen ta contento cu esey y e personal ta duna hopi di nan mes. Tur esey ta extra. “Djis pensa cu henter dia ta draai cu cliente, traha den solo tin biaha den cura y atardi, ora nan bay cu bus, ainda ta tras di computer pa notula, pa raporta kico tur a pasa. Ta pidi hopi di e personal. Pero fruta di e trabao ey, tur ta gosa di dje. Si mira un cliente bay p’adilanti, ta algo fantastico,” segun van Homelen.
Pa contacto
E number di telefon central ta 5227842. Eynan ta haya e secretaria y por haci cualkier pregunta. E por verwijs na cualkier afdeling cu e centro tin.
