Durante Censo Economico, nos redaccion a haya un keho di comerciante cu nan ta forsa pa Central Bureau of Statistics Aruba (CBS) pa contesta pregunta basa riba un ley.
Te hasta, segun e informacion, ta haci esaki cu un tono menasante. Ta yama comerciante pa recorda nan pa haci un cita p’asina laga e encuestadonan bin.
Durante un conferencia di prensa unda CBS a lansa nan Encuesta Laboral 2023, nos redaccion a haci Directora Interino di CBS, Desiree Helder, e pregunta si CBS ta reconoce su mes den e declaracionnan aki.
COOPERACION TA DIFICIL
“Nos mes no ta tuma contacto hopi cu e personanan cu nos ta selecciona, y den Censo Economico ta berdad di companianan, pero nos ta instrui si nos encuestadonan – den e caso aki di Censo Economico pa indica na e companianan cu e participacion ta obligatorio.”
Ta asina cu si a caso nan no ta coopera, naturalmente CBS ta manda nan un recordatorio un bes mas via mail, ta yama nan pa recorda pero ‘menasa mi no sa di unda esey ta bin’ segun Helder.
“Tono ta algo cu tur hende ta compronde diferente. Pero t’asina cu pa un Censo Economico sigur e participacion ta obligatorio, eigenlijk pa tur encuesta e participacion ta obligatorio pero nos no ta papia di menasa, pero cada biaha ta bira mas dificil pa haya cooperacion.”
