Diabierna anochi algo pasa di 7:00 pm a sosode un accidente riba e caminda di Pos Chikito, net na e rotonde dilanti scol basico Santa Famia. Den e accidente aki tabatin dos auto di e mesun marca, Chevrolet, envolvi. Esun no a regula su velocidad y a bay dal un bocht mucho grandi, cu consecuencia cu el a dal den e otro.
Pero, na momento cu polis a yega na e sitio, a constata cu e chauffeur di un di e autonan, esun cu a ocaciona e desgracia, tabata burachi. A lag’e supla na e sitio mes, pero e test a sali malo p’e. A opta pa deten’e mesora na e sitio y hib’e warda di polis pa mas investigacion, interogacion y posiblemente detencion.
Stuur auto burachi ta un delito den nos leynan di trafico. Pero, ocaciona un accidente siendo bou di influencia di alcohol, ta haci e problema mas serio. Mester percura semper pa tin un chauffeur cu no ta bebe, pa stuur pa bo, despues di un paranda. De lo contrario, bo por haya bo den problema cu husticia, cu como consecuencia cu bo por hasta perde bo rijbewijs.
Mensahe: Si bo mester ayudo cu bo bebemento, tene cuenta cu bo por cura bo mes. Tuma contacto cu Alcoholics Anonymous Aruba, cu tin dos centro di apoyo, un na Noord y otro na San Nicolas y tin reunion tur dia. Ey lo bo topa personanan cu sea ta den problema of a sali di e problema cu por nifica un bon guia y sosten pa bo, pa yuda bo sali for di e vicio. Pens’e!
