Corte recientemente a duna DIMAS rason pa a tuma medida disciplinario contra e empleado publico Johan Richardson. El a haya su retiro condicional pa motibo cu el a duna of trata di duna un colega femenino un sunchi contra su boluntad. E hecho aki a wordo denuncia door di e señora na su hefe, kende a tuma e pasonan necesario.
Richardson ta traha na departamento di DIMAS unda e hecho a tuma luga dia 2 di maart 2017. Riba e mesun dia ey su colega femenino a haci un keho contra dje. Den e carta e ta bisa cu e homber a bini cerca dje pa busca informacion riba status relaciona cu un prolongacion turistico; despues e homber a bay na e seccion di “afgifte” pa haya informacion di e file aki. E denunciante a sigui’e pa informe cu e peticion aki a wordo manda un siman prome caba pa wordo firma.
E ta sigui splica cu su colega tabata para e momentonan ey na e porta y e tambe a keda para eynan pa informa di e “file”. E homber a pone su cara (cabes) hopi cerca di esun di dje manera cu e ta bay dun’e un sunchi. Mesora e señora a informa e homber cu e no mester trata di un forma asina irespetuoso y cu e no ta di acuerdo cu loke e ta haci. Esaki no tabata prome biaha cu e homber ta aserk’e di un forma poco respetuoso y cu no ta prome biaha el a entrega un denuncia contra dje pa “sexual harrasment”.
Durante tratamento di e caso a bini dilanti cu entre 3 y 8 di maart tabatin diferente combersacion entre denunciante, e homber y dos otro colega. Den un carta di dia 9 di maart e Minister encarga cu DIMAS a prohibi entrada na tur facilidad di DIMAS pa un periodo di seis siman. Den un carta fecha 13 di april, e director di DIMAS a pidi DRH (Departamento di Recurso Humano) pa cuminsa un procedura disciplinario contra e empleado. Entrante 24 di april el a bolbe trabou.
Den un carta di dia 12 di september Gobierno ta inform’e cu a base di informacionnan di director di DIMAS, el a haci actonan cu no ta aceptabel, esta “sexual harrasment”. Den e carta e ta wordo mustra cu el a faya cu su obligacion di un bon comportacion. A dun’e 7 dia pa e reacciona. El a contesta te dia 7 di october, bisando cu enberdad el a bay para cerca di su colega pero a bay haci un joke manera comosifuera cu e ta bay dun’e un sunchi. E ta nenga di a actua cu falta di respet y cu mas biaha nan sa haci joke cu otro; cu e denunciante a yega manera un baño di awa friu p’e pasobra e colega ey hopi biaha sa haci joke cun’e y nunca a tuma esakinan na serio; e no ta kere di a causa daño na e ambiente profesional den DIMAS y cu esey sigur no tabata su intencion tampoco.
E director a contest’e dia 5 di december informand’e cu mirando e servicio cu nan ta brinda e mester actua semper di un forma profesional. Su comportacion y actuacion no ta pas den un organisacion profesional. E mester por tabata sa cu no tur hende ta habri pa jokenan for di sla.
E carta cu Richardson a ricibi ta papia di un comportacion nada colegial y intimidacion sexual pa cu un colega femenino y no tin nada cu por bisa cu e no ta wordo poni responsabel pa esaki. Ya caba den pasado tabatin un melding di intimidacion sexual. E caso ey a wordo cera cu un combersacion y no a wordo hinca den su dossier personal.
Basa riba tur esaki, dia 11 di juni 2018 el a haya un carta cu su retiro condicional. Esaki ta nifica cu e no ta wordo retira si durante dos aña e no haci su mes culpabel pa un comportacion similar. El a bisa si cu e castigo ta demasiado pisa. DIMAS hasta a haci uzo di e informacion cu un biaha el a manda un potret di su parti intimo na un colega, pero no a averigua si esey tabata algo deseabel of indeseabel pa e colega.
Hues ta bisa cu e ambtenaar masculino a admiti cu el a yega cerca di su colega y den un forma di joke a haci manera e ta bay dun’e un sunchi. Su actuacion por wordo cataloga como intimidacion sexual. Ta trata aki di un actuacion cu un conotacion sexual cu e consecuencia cu su colega no a sinti su mes “safe” na trabou.
E hecho cu den pasado caba tabatin un denuncia contra dje, mester tabata un advertencia pa e mira con e ta actua. E violacion di debernan di un bon ambtenaar ta exigi un castigo y esun cu a wordo imponi ta na su luga. Y e no ta pisa, pasobra su retiro ta condicional. Como tal Hues ta haya e castigo impone na su luga. Richardson como tal a perde e caso y mester core cu e gastonan envolvi.
