Siman pasa tabatin un caso den corte contra dos ciudadano Indio, kendenan Ministerio Publico a trece dilanti mesa berde. Y asina mes na final e tratamento di e caso no a sigui debi na peticion di e abogadonan defensor.
Ta trata aki di Harinder Singh (40) y Aruna Karishma (38), kendenan tabatin cinco acusacion contra nan: Tur a sosode den e periodo di prome di mart, 2017 te 23 di october, 2017. E acusacionnan ta mensenhandel y mensensmokkel (Trafico y trata di persona), declaracion falso, a duna estadia na un persona indocumenta y falsificacion di documento.
E partido perhudica den e caso aki ta Anita Paramjit Jasvir Kaur pero a bandona Aruba na 2017 caba. Y esaki ta loke a haci e investigacion dificil. E abogado anterior envolvi den e caso a fayece y otro dos abogado a tuma e caso over.
Hues comisario dado momento a trata di haya contacto cu e victima, debi na preguntanan cu tin relaciona cu e investigacion of declaracion cu el a duna. A pidi un cooperacion cu husticia cu India, via e canalnan oficial pero Aruba en realidad no tin acuerdo cu e pais.
Despues di a warda dos aña hues comisario a dicidi cu no por keda wanta e caso mas y a kere cu ta miho laga hues dicidi riba e caso. Net despues di esey, na december 2023, a haya algun informacion for di India. Ta hopi dificil.
E abogadonanan aki tabatin masha problema cu e forma con OM a atende cu e caso aki. Principalmente pa loke ta e traductor uza, cu a resulta cu e no ta uno huramenta. Masha keho e abogadonan tin den e caso. A scucha e testigo, sin presencia di abogado defensor. Na final nan tabatin acceso na solamente un audio cu tabata di e di tres interogacion. Ora cu a a scucha esaki cu e acusadonan, a constata cu tin masha cos bruha den e traduccion.
Defensa, mr. Illes y Mr. Rossi Marchena, a haci tres peticion na corte. Na prome luga pa inclui den e procesverbaal e grabacion di interogacion haci pa e denunciante. Nan a interoga e denunciante y a graba esaki. For di e grabacion a traha un relato y solamente esey a pone den e PV. Banda di inclui e grabacion, a pidi tambe pa laga un traductor (tolk) huramenta haci e traduccion ey y pa scucha e testigo atrobe. Pa cual motibo caso no por a sigui.
Pa mas detayes abona riba TREMPAN.
