Riba e ultimo dia di siman, baseball a ricibi un sla duro. Tabata alrededor di 11:00 am ora cu a bati alarma p’un container na candela den Gallegostraat.
A mobilisa brandweer di biaha p’e sitio. Berdad, na nan yegada a bin topa cu un pida mondi na candela cu a pasa over y penetra den un container. Mesora a bay den accion y a logra domin’e p’asina e candela no tuma poder completo di e container. Bisiña mesora a tuma contacto cu doño di e container, kende ta e conocido, Karel “KayKay” Williams, un deportista activo y entrenado di hopi aña. KayKay a presenta su mes na sitio p’asina tuma nota di e daño.
Den un entrevista cu representante di Headlines Group, kende t’e cas editorial di 24ora.com y TREMPAN, el a conta cu e ta fastioso pa nan lanta bo diadomingo for di bo cama y informa bo cu bo container ta na algo. Hopi cos a bay perdi pero gran parti a logra scapa toch. Di e materialnan cu a kima, ta ekipo nan di baseball y algun pertenencia personal. Entre nan, keds pa regala mucho di baseball, gloves, set di catcher, BBQ pit, porta y mucho mas.
E container tabata na cas di KayKay prome, pero riba dia di eleccion gobierno a pidie pa hala su container pasobra e ta stroba. A dicidi di mov’e y pon’e riba tereno di su ruman muhe. Na dos ocasion a horta den dje caba pero awo a dicidi di pone un sistema di lock mucho mas fuerte. No tin mucho cos di balor pa horta aden, mas bien ta material di baseball. Asina mes a logra scapa basta uniform di baseball cu no a kima.
KayKay a comenta cu e tin hopi aña ta pidi gobierno pa ehecuta un proyecto pa Little League, pero te dia di awe nada. Gobierno a bin y gobierno a bay, di tur color, nada pa deporte. E tin tres container yen cu material pa pone na disposicion di baseball, den container ta bieu so nan ta bira y sin uzo p’e. “M’a cansa om”, asina Williams a indica. Cu masha dolor KayKay a comenta cu, ta parce cu despues di casi sesenta aña den baseball, esaki t’e regalo cu e ta haya. Henter e area ta birando un dump. Desde cu Minister Ursell Arends a cera dump na Parkietenbos, a habri hopi mini dump rond di Aruba. A pidi Serlimar na mas di un ocasion pa bin haci e area limpi, pero nada.
