Ya for di ayera caba tabatin rumor cu casa di ex-minister y parlamentario Benny Sevinger (AVP) lo sali liber. Y esey a bira un hecho pasobra no mucho rato pasa, a drenta informacion cu Claudia Sevinger a haya su libertad. E tabata encarcela for di diaranson na ward’i polis di Noord, situa na Shaba.
Diaranson ultimo, Ministerio Publico a laga detene tanto Benny Sevinger como su casa Claudia riba sospecho di a comete varios hechonan castigabel, entre otro, soborno (omkoping), abuso di cargo (ambtsmisbruik), labamento di placa (witwassen) y participacion na un organisacion criminal (deelname aan een criminele organisatie).
FIN DI UN ESPERA
E encuentro entre mama y su yiunan Stephany y Brian Sevinger tabata uno hopi emocional dilanti ward’i polis na Shaba. Pero ainda nan sufrimento no a caba, pasobra ainda nan tata, Benny, ta den detencion na ward’i polis di Santa Cruz. Claudia ta conta cu nan a hacie algun pregunta y tur cos a keda cla te cu nan a lag’e bay. E ta mas trankil. E mes no a spera cu nan lo a lag’e bay. E ta rabia si, pasobra ta algo inhusto.
Mientrastanto e lucha di Stephany ta sigui te ora cu su tata sali pa e continua e lucha su mes. Pero si ta bay cumpli cu e tarea laga atras. E no ta bay keda keto pasobra ta un inhusticia di loke ta pasando. Sinembargo e lo abstene di sigui papia. Famia ta hopi contento cu Claudia a sali. Solamente falta Benny pa sali. A bisa Stephany cu lo extende e detencion di su mama y no a spera cu nan lo a lag’e liber. Esaki ta demostra cuanto prueba nan tin berdaderamente. Esaki sigur ta un bon noticia pa henter famia.
SUSPENSION DI DETENCION
Ayera atardi, riba peticion di Ministerio Publico mes, hues-comisario a suspende e detencionnan den e caso contra e sospechosonan Franklin F. Abath, Freddy P. Every y Maria Leoncita Arends, pero mara na cierto condicionnan. Banda di condicionnan general, hues-comisario a pone como condicion special cu e sospechosonan ta prohibi di tin contacto cu cierto personanan y cu nan mester coopera cu e investigacion. Mientrastanto e sospechosonan Pieter Th. A. Susebeek como tambe Benny Sevinger ta deteni ainda pendiente pa mas investigacion riba e caso.
E prome detencionnan cu a tuma luga tabata di Rebecca Richardson, yiu di Leoncita Arends, como tambe Jeff Franken, Gaby Werleman, su casa Ninosca Nuñez y tambe Mary Hsing, caminda tur ta den libertad actualmente.
E CASO AVESTRUZ
Ministerio Publico a informa dia 2 di october 2019, dia cu a haci e entradanan hudicial, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro echonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017.
