Rafael de Cuba, director di Cas di Speransa Nobo, den un entrevista a comenta riba e trabou cu nan a bin ta haciendo. E proyecto aki ta uno cu a cuminsa mas o menos un aña y mey pasa na Alto Vista.
De Cuba a splica cu e trabou cu nan ta haci ta positivo. E tipo di trabounan aki, el a bisa, semper tin su retonan pero cu na mesun momento ta haci esnan cu ta trahando riba esaki mas fuerte pa sigui cu e trabou. Un di e retonan grandi di e proyecto aki ta e aspecto financiero. Mester a crea un forma nobo pa haya e fondonan necesario y haci un planeacion diferente.
Asina a dicidi di converti e area unda cu nan a cuminsa cu nan trabou, na Alto Vista, den un negoshi y crea fondonan necesario pa por sigui cu e trabou pa yuda personanan den comunidad. E proyecto tin 3 luna aki andando na Alto Vista, y nan ta mira cu e ta hopi productivo.
A dicidi di muda e studiantenan di Cas di Speransa Nobo pa Seroe Biento 27-A p’asina por sigui funciona, dunando e ayudo necesario. Mescos cu Adult & Teen Challenge su presidente a bisa den un otro entrevista, e programa pa yuda ciudadanonan tin su gastonan cun’e, pero apesar di esey no ta cera porta pa ningun studiante cu kier drenta e programa. “Nos ta un team para completamente tras di e studiantenan, pa yuda nan mira un bida cambia. Principalmente pa esnan cu door di adiccion ta riba caya y a kere cu nunca mas nan lo por cambia. Global Teen Challenge ta responsabel pa 80% di e esnan cu ta cambia nan bida, rond mundo.”
Na Aruba tin diferente programa pa yuda esnan cu kier cambia, ya cu e necesidad ta hopi grandi. E programa di Cas di Speransa Nobo ta uno hopi estricto y hustamente esaki, segun de Cuba, ta loke cu ta yuda e participantenan pa trece un cambio den nan bida. E studiantenan mester ausenta, aleha totalmente di e mundo externo y esaki ta encera cu nan no mag tin telefon of comunicacion pa cierto tempo te ora cu nan desaroya cierto nivel di dominio contra e droga, pa nan por mescla cu otro personanan di pafo. Esaki ta un parti hopi duro pa pasa aden. “Nos ta hopi exigente cu nos programa pa loke ta disciplina y regla cu mester mantene nan mes na dje pa nan cambia. Nos kier pa nan cambia e programa completo pa e resultado ta un bida transforma.” Den un aña y mey cu ta trahando riba e proyecto aki, nan ta bay logra pronto nan di dos graduado kende ta completamente cambia. Ya caba e tin un bida completamente nobo. E prome graduado ta Luisdinho Judan y e di dos lo ta Ricardo Yarzagaray, kende lo gradua na mei awo. Ta exigi for di e persona cu ta e dispuesto y kier cambio pa cuminsa yud’e riba e caminda aki. El a recorda cu e ta un structura, unda e hende ta e parti central y ta haya hopi atencion. P’esey ta exigi cu mester pasa e programa completo, unda cu tin hopi lucha pa logra yega e final. Pa logra esaki ta bay profundo den e emocionnan y e aspecto spiritual, kibra cu e rebeldia cu tabata domina un persona.
