Den combersacion cu Yvonne Simon Andrade, Presidente di Adult & Teen Challenge Aruba el a papia di e plannan grandi cu e organisacion aki a pone como meta pa realisa den 2019.
E plan aki ta dirigi riba e problema di adiccion y proteccion pa e hende muhenan hoben cu tin problema.E organisacion a bin ta den contacto cu Adult & Teen Challenge Women’s Centre na Oklahoma y Freedom House Teen Challenge un colaboracion masha importante. Nan a priminti cooperacion na e organisacion local pa yuda lanta un Centro pa Hende Muhe.
E ta un centro specialmente pa hende muhenan adulto / hoben cu ta riba caya y tin problema cu adiccion, pero cu kier drecha nan bida. E colaboracion a keda concretisa y awo ta bay traha pa ehecuta e proyecto y anuncia fecha di apertura di e centro aki.
Aunke anteriormente no a tende casi nada riba e tema aki, Adult & Teen Challenge Aruba a bin ta trahando pa un aña caba y a busca ayudo di e organisacion cu tin e tipo di centro aki mas exitoso na Aruba. Nan expertonan a bishita Aruba diferente biaha caba durante cual a cana rond, sondeando e posibilidadnan y e instancianan cu tin ta traha riba e tereno aki. Aworaki no tin nada igual of similar den Caribe.
Segun sra. Simon ta bisa, cada biaha nan ta constata cu e necesidad pa un centro asina ta bira mas grandi, pa cual ta trata di pusha e proyecto pa esaki keda realisa mas lihe. “Door cu nan tin mas experticio y tin un centro cu ta acomoda mas di 50 hende muhe cu ta haci ta duna nan e conocemento necesario, nan lo guia nos den e proceso pa lanta e centro aki na Aruba,” Simon a splica.
Di otro banda, e organisacion Mericano a ofrece 4 beca pa studiantenan di Aruba cu kier haci un cambio den nan bida y kier duna un contribucion riba e tereno aki. E beca ta encera cu nan mester sigui e programa durante un aña largo y si kier sigui den direccion di liderazgo, nan lo mester participa den un otro programa cu lo tin un aña mas di duracion. “Den e programa aki prome e studiantenan ta traha riba nan mes, pasobra hopi biaha nan tin hopi aña hinca den adiccion of cu problema di adiccion, cu a controla nan bida y no a laga nan crece. E programa ta yuda nan yega na e libertad completo pa ta personanan prospero den comunidad.”
El a splica cu ya caba tin e prome studiante, den persona di Miriam Tromp, kende tin tres luna na Oklahoma caba y awor ta preparando pa banda e di dos becado (studiante). Ora cu nan gradua, nan lo yuda lidera e proyecto di Centro di Hende Muhe y brinda e ayudo necesario na e clientenan.
