Bin disfruta Diabierna Dia 26 di Juli cu actividad gratis pa henter famia Museo Arqueologico Aruba den colaboracion cu MUSEON Den Haag y Secar Research Center di St. Eustatia a planea un evento como parti di su programa conhunto pa publico en conexion cu e exposicion ‘Caribbean Ties, Connected people, Then and Now’ y Diabierna Dia 26 di Juli Museo Arqueologico ta lanza su parti di “Caribbean Fair”.
Bin pasa un dushi rato den ambiente Caribeño entre 5 pa 10’or di anochi cu tayer creativo, presentacion interesante, dushi cuminda Caribeño y hopi mas! E atardi y anochi aki, cuminsa ndo pa 5.30 pm artista contemporaneo Osaira Muyali di Studio O lo presenta e historia tras di e ‘City Art’ di e cabaynan blou den Oranjestad, sigui pa un presentacion pa arkeologo drs. Harold Kelly tocante e periodo Archaico, cu informacion nobo di nos historia Indian di Aruba, cu a sali danki na e investigacion di NEXUS1492. 
Entre 5.30 pa 7.30’or pm artista conoci pa su obranan di klei, Trudy Lampe lo duna un tayer di e tecnica di ‘coil’ cu Indiannan di Aruba y den Caribe tambe a uza pa traha nan potchi. Artista local Gloria Feliciana lo duna un tayer di traha prenda cu glas di lama, reciclando asina un material cu no ta pertenece den nos medio ambiente, pero cu Indiannan tanto na Aruba como den Caribe a cuminsa incorpora den nan decoracionnan den e periodo historico despues di e promer contacto cu Europeanonan. 
Otro artista cu tambe a join in, Maya Lepsanovic lo duna un tayer di traha un ‘flamingo fridge magnet’ na unda e particpantenan lo decora un pida di (drift)wood cu pintura den colornan caribense. Tur e workshopnan aki ta gratis y cortesia di MUSEON.
Alavez lo tin dushi cuminda Caribense na benta, manera un dushi BBQ, un invento di traha cuminda originalmente di Indiannan, pues e nomber mes ta bin di e palabra indigena barbacoa. Tambe Taki lo tin dushi snacks traha di entre otro cadushi y juice di walishali. Lo tin stand di cuminda Surnam y Cubano y purba tambe un dushi cuminda of pasaboca di Dominica, St. Maarten y Trinidad. Stichting Rancho lo ta na encargo di e bar, di e forma aki recaudando fondo pa nan bon trabou den comunidad di e bario Rancho.
Fundacion Lanta Papiamento tambe lo ta presente cu actividadnan entretenido, promoviendo nos dushi idioma Papiamento cu su palabranan origina di idiomaman diferente di Indian. Tanto Directie Cultuur Aruba y Fundacion 1403 tambe ta sostene Museo Arqueologico y ta partner pa e evento aki. Y mas cu claro lo por cumpra e buki nobo ‘The Archaeology of Aruba; The Pictographs and Petroglyphs’ tambe durante e evento di Caribbean Fair. Pues ‘save the date!’ No perde e dushi evento di Caribbean Fair dia 26 di Juli na Museo Arqueologico na Schelpstraat 42, patras di Kong Hing den Havenstraat. Sigui nos pa mas informacion riba facebook Archeo Aruba y National Archaeological Museum Aruba.
