Caribbean Examination Council ta bishitá Minister Marilyn Alcalá- Wallé

Minister di Enseñansa, Siensia, Kultura i Deporte (ESKD), sra. Marilyn Alcalá-Wallé a risibí bishita di dr. Carol Granston i Jodine Williams di Caribbean Examination Council (CXC) for di Jamaica.

E enkuentro aki tabata pa sera konosí i dialogá tokante e programa di estudio i èksamen na ingles ku CXC ta ofresé pa Enseñansa sekundario. E maneho di idioma nashonal i di enseñansa a keda akordá na aña 2017 i Ministerio di ESKD ta trahando riba ehekushon di e maneho aki. Un grupo piloto ta instituí pa ehekushon.

E maneho ta dirigí riba krea suidadano kompetente pa medio di uso di idioma. Pa e motibu aki maneho ta titulá: “Na kaminda pa Koeksistensia Multilengual”. Vishon di esaki ta pa suidadanonan dominá 4 idioma. Kada un na un sierto nivel: papiamentu, hulandes, ingles i spaño. Di e forma aki nos ta krea suidadanonan global ku abilidatnan di siglo 21, segun vishon di gabinete Rhuggenaath, stipulá den e Akuerdo di Gobernashon 2017-2021. CXC ya ta eksistí 40 aña i ta brinda oportunidat pa e hóben studia na ingles i finalisá skol sekundario pa medio di éksamenan digital na ingles.

Tambe e hóben ta risibí un diploma ku ta akoplá na un estudio avansá na ingles den region o na Hulanda. CXC ta rekonosé pa NUFFIC, un organisashon Hulandes pa internashonalisá edukashon. Esaki ta garantisá konekshon sin ningun problema ku estudionan avansá òf superior den regio òf na Hulanda. Un di e metanan di CXC ta pa den 2020 mayoria èksamen keda ofresé di un forma digital. Durante e reunion a kombersá tokante e.o. e sistema di enseñansa di CXC, e tareanan, e kalidat di estudio i èksamen i tambe e estudionan di CXC. A palabrá ku ta bai sigui dialogá i hasi mas evaluashon tokante lokual CXC ta ofresé.

Comments

comments