Vivienne Gomez-Rivadeneira ta bek den luznan publico despues di basta tempo. “Calma e tempestad” ta titulo di e cancion cu e artista a haya cu esaki ta e momento adecuado pa present’e na pueblo di Aruba.
Na aña 2014, el a skirbi e letranan di un cancion, a base di temponan dificil cu nos ta pasa aden. Anto despues di 6 aña, a yega e momento pa lansa e cancion aki.
Un cantica, den forma di un storia cu ta un refleho di nos bida. E contenido di e cancion ta a base di e texto caminda Hesus a bay den boto cu Su apostelnan y diripiente a lanta un mal tempo. Hesus a pega soño, mientras cu e apostelnan a pensa cu nan lo muri riba lama. “Mi ta invita bo, lesa e texto aki of scucha e cancion nobo aki, cu lo anima bo pa invita Hesus den bo bida, pa e tuma control y calma cualkier tempestad cu bo por ta pasa aden awor. Den e pandemia aki, hopi di nos a pasa y ta pasando ainda den temponan dificil.”
Vivienne Gomez Rivadeneira ta sinti cu e pueblo tin mester mas y mas di musica cu ta duna forsa y cu ta anima cada un di nos, pa duna Hesus un luga special den nos bida. “Mi tin pleno confiansa cu e cancion aki lo yuda hopi hende, pa yama riba e nomber riba tur otro nomber, cu ta e nomber di Hesus.”
E artista ta pidi apoyo di media di Aruba, cualnan e ta bisa ta hunga un rol importante den comunidad. E ta pidi tur hende pa comparti e cancion aki, bendiciona nan bida y haya paz y goso di Señor.
Keda pendiente pa e video-clip cu e lo lansa riba su Facebook-page. Djey lo manda e link publicamente pa comparti cu tur ser keri, na Aruba, Curacao, Bonaire y rond mundo.